MP Sapa leh MKHC hruaitute an inkâwm
Rajya Sabha MP Ronald Sapa Tlau leh Mizoram Kohhran Hruaitute Committee (MKHC) hruaitute chu nimin khan Synod Office-a Committee Room-ah MKHC chairman Rev. R Lalhmingthanga kaihhruaiin an inkâwm a, tunlaia India ram chhung boruakte leh Kristian sakhua leh missionary-te himna chungchangte an sawiho.
MKHC hian Isua Krista thupek - Chanchin Ṭha rawngbawlna hna a taka thawktu (missionary)-te tan India ramah kawng a ping tial tial nia an hriat avangin, Mizoram leh Mizo Kristiante tana awmze neia hma la theitu leh sûl sutu ni thei tur MP Ronald Sapa Tlau chu MKHC meeting-ah thu sawi turin an sâwm a ni.
MKHC hruaitute chuan, prime minister Narendra Modi hnenah MKHC-in CAB an duh loh thu leh pass lo tura ngenna thawn an tum thu an sawi a; CAB pass a nih loh nan Mizorama kohhran zawng zawngte ṭawngṭai rualna hun hmang tura an ngen dawn thu an sawi bawk.
Inkawmnaa an sawi tlangpui
1. India ram secular state a nih angin, sakhaw zalenna mi tin tan a pawimawh.
2. Central-a sorkarna chelhtu BJP kaihhruai NDA sorkar thupui hlapui bera an neih - Hindustan (Hindu lalna ram) siam a nih avangin sakhaw tênau Kristian awm tam berna ram, Mizoram chu an mit timîmtu leh ngaimawh ber kan ni tih a chiang.
3. The Citizenship (Amendment) Bill, 2016 (CAB) chungchangah, kum 1995-a Bill an pass tawh chu an rílrem zawnga siamṭhain dana chantir turin Lok Sabha-ah an pass a, Rajya Sabha-ah an lo dan avangin Lok Sabha inthlan hmaa pass hman turin a inmung mek.
4. CAB-a Buddhist sakhua a telna chhan hi Sri Lanka, China, Bhutan leh Myanmar-a Buddhist-te an ni lo a, Bangladesh-a Buddhist-te an ni.
5. Mizoram dep maia awm Bangladesh Chakma-te hi Mizo mipui zat an ni a, Mizote chîmral turin BJP sorkar khalh kaltu RSS-te hian an ṭha ber a ni tih an hmu chiang.
6. Mizoram chauh hi Chakma hnamin ram leh mipui thlan tlin sorkar an neihna ram a nih a vangin Bangladesh aṭangin an hmu tâi em em.
7. CAB hi pass a nih chuan Bangladesh aṭanga Chakma rawn lutte'n vote an neih vek dawn avangin state sorkar siam chungchangah leh CM leh MP-te hial pawh an chan theih dawn avangin, kan hnam leh kan sakhuain a rinpui ber dan siamtu Assembly hmang ṭangkaiin kan hnam leh kan sakhua chîmral a hlauhawm em em.
8. Mimal leh party ngaihdan zawng zawng dahṭha a, tho thil ang thlapa Bill dodal tura ṭan tlan a ngai.