CAB 2016 dodal nan January 23-ah Mizoram pumah kawngzawh dawn

MZP Gen. Hqrs. Executive meeting nimina neih chuan, The Citizenship (Amendment) Bill, 2016 (CAB) dodalna kal zelah, January 23, Nilaini-ah Mizoram pumah kawngzawh huaihawt an rel.

MZP tarlan danin, CAB dodalna kal zelah North East Students’ Organisation(NESO) chuan hmarchhak state hrang hrangah nasa lehzualin CAB dodal zel a rel a, chumi atan chuan hmarchhak bial pumah January 30, 2019 ral hmain mahni state ṭheuha kawngzawh huaihawt an rel a ni.

Nimina MZP meeting chuan NESO thurel bawhzui dan tur an ngaihtuah a; January 23, Nilainia Mizoram puma 'Hnam chhanna kawngzawh' huaihawt an rel rualin, kawng zawhnaah hian, 'India hmarchhak bial mipui hmusittu Narendra Modi, prime minister leh Rajnath Singh, union home minister lim hâl nghal ni se,' tiin a rêl.

MZP chuan, January 23-a 'Hnam chhanna kawngzawh' nei turin MZP headquarters, sub-headquarters leh branch zawng zawngte bakah, hnampual zirlai pawla an thawhpui - Mara Students' Organisation, Lai Students' Association, Siamsimpawlpi, Hmar Students' Association, Mizoram Bâwm Students' Association, Ranglong Student' Union, Páng Zirlai Pawl leh Thado Kuki Students' Union-te chu an huam chhungah kawngzawh huaihawt vek turin an ngen a ni.

'Hnam chhan kawngzawh' neih turah hian tel vek turinMZP chuan zirlaite leh Mizo mipui zawng zawng an sáwm bawk.