CAB 2016 dodal ṭha ngam lo-ah ZPM ṭhalaiin CM Zorama an puh

Zoram Peoples Movement (ZPM) ṭhalaite chuan thuchhuah siamin, chief minister Zoramthanga chu BJP sorkar mitmei ven vanga The Citizenship (Amendment) Bill, 2016 (CAB) duh lohna leh dodalna hmélhmang tilang ṭha ngam lo-ah an puh.

ZPM ṭhalaite chuan, CM Zoramthanga'n Mizoram mamawh leh ṭulte ngaihtuaha sorkar laipui dâwra hma a laknate chu lawmawm an tih thu an tarlan rualin, "Central-a BJP sorkar mitmei a venna avanga The Citizenship (Amendment) Bill, 2016 duh lohna leh dodalna hmélhmang a tilang ṭha ngam lo hi pawi kan ti a, vanduaithlak kan ti tak zet a ni," an ti.

India hmarchhak state hrang hranga tualṭo party-te leh BJP thawhpui sorkarna chelhtute'n an ram leh hnam hmakhua ngaia CAB dodalna a taka an lantir thu sawiin ZPM ṭhalai chuam, "A tuar ber tur ram kan nih pawh hre chang loa lalna leh thuneihna ringawt âtchilh vanga MNF president, CM ni bawk Pu Zoramthanga’n CAB chungchangah thapui thawh tumna vawiin thlenga a la nei ngam lo hian ram leh hnam humhalhna a vei lohzia a tichiang hleah kan ngai," an ti a; Zoramthanga chu CAB a dodal tak zet a nih chuan BJP nena an inthlun zawmna NEDA aṭanga inhnûkdawk turin an phût.

ZPM ṭhalaite chuan, Mizoramin ram leh hnam humhim thei tur sorkar chak leh thil ti thei a mamawh tak zet tih sawiin, "Chumi tihlawhtling tura ZPM-in theihtawp chhuaha a hmalakna hi hlawhtling taka hlenchhuah a nih theih nan theihtawp kan chhuah zel dawn a ni," an ti bawk.