KHAWTHLIR

Pachhunga University College NSS unit chuan, nimin khan an college-ah blood donation camp an huaihawt a, Aizawl Civil Hospital tan thisen unit 244 an pe a, a petute mipa 169 leh hmeichhia 75 an ni. PUC hian academic session kal mekah, a hmaa thisen unit 554 an lo pek tawh nen unit 798 an pe tling tawh a ni. 

MZP chuan thuchhuah siamin, Mizo ṭhalaite Mizo ṭawng hman dik kawngah an inthlahdah lutuk nia an hriat thu leh hnam ṭawng hlutna a tlahniam nia an hriat thu an tarlang a, "Lehkhabu chhiar kan peih ta mang lo hi kan hnam leh zirlaite tan kan nakin huna thil pawia thlen theih dawn avangin, MZP chuan kan hnam ṭawng kan hlut deuh deuh a, zirlaite'n zirlaibu bakah, lehkhabu dang chhiar uar turin Mizo ṭhalaite kan ngen a ni," an ti. 

Mizoram Police Sports Meet chu nimin khan Rajiv Gandhi Stadium-ah DGP Balaji Srivastava-in a khâr. Meet-ah hian gold medal 14 latu Red Group-pakhatna an ni. DGP chuan, Mizoram Police Sports & Cultural Control Board-in Sports Meet hlawhtling taka an buatsaih chu lawmawm a tih thu sawiin, "Mizoram Police unit hrang hrangte'n ni nga chhung inlungrual taka Sports Meet kan nei hi a lawmawm hle a ni," a ti.

Mizoram University chuan nimin khan under graduate first semester, third semester leh fifth semester exam result a tichhuak a; zirlai exam 18,930 zinga 11,611 an pass a, pass percentage chu 61.34 a ni.BA-ah chuan 1st., 3rd. leh 5th. semester-ah zirlai exam 15,975 awmin, 9,500 an pass a, 59.47% pass ang an ni. BSc.-ah zirlai exam 2,001 awmin, chu'ng zinga 1,374 (68.67%) an pass. BCom-ah chuan zirlai exam 873 awmin, chu'ng zinga 675 chu an pass a, pass percentage chu 77.32 a ni. BSc (Home Science)-ah zirlai exam 81 zinga 62 (76.54%) an pass bawk.