Chief Minister-in BANERGISE seminar hawng
Ministry of Micro, Small and Medium Enterprises (MSME) hnuaia MSME Development Institute, Kolkata leh MSME Development Institute, Aizawl chuan nimin khan Aijal Club-ah 'Bengal and North East Region Green Innovators & Social Entrepreneurs' (BANERGISE) national seminar an buatsaih a; chief minister Zoramthanga'n a hawng.
Seminar hawnna inkhawm hi MSME Development Institute, Kolkata director Ajoy Bandopadhyay-a'n a kaihruai a; Reserve Bank of India, Aizawla general manager Mary L Deng, Planning secretary Dr C Vanlalramsanga leh Horticulture secretary Rodney L Ralte secretary te khualzahawm an ni.
CM Zoramthanga chuan, Mizoram chu ram rálmuang, ruahtui dawng ṭha, a mi chengte pawh ṭawng khat hmang, sakhaw khat bia leh culture angkhat nei an nih thu sawiin, "Pathianin kan rama malsawmna a dah zawng zawng hi kan hman ṭangkai turin a dah a ni a. Mizoram hi India ram state zinga economy ṭha ber state-ah siam theih kan inring," a ti.
Mizoram chu Agro-forest based industry ṭha tak nei thei a nih thu sawiin Zoramthanga chuan, "Industry innghahna tlak din tur hian eng nge pawimawh tih ngaihtuah hmasak a ngai a, khawiah nge raw material kan hmuh ang, a phurh khawmna kawng, a sawngbawlna khawl bun leh a hralhnate ruahman fel sa a awm chuan Mizo ṭhalaite tan hna tam tak a awm thei dawn a ni," a ti a; Mizoram ṭhalaite tan intodelhna kawng kawhhmuh chu an tih tur, a taka kalpui ngai a nih thu a sawi.
RBI general manager Mary L Deng chuan, bank aṭanga an hmalak tawh dan te, bank pawimawhna leh scheme hrang hrangte a sawi a; Dr C Vanlalramsanga chuan Mizoram Kailawn leh Mizoram Rahbi chawikânna atana sorkar hmalak tawh dante a sawi.
Rodney L Ralte chuan, BANERGISE chuan Mizo entrepreneur-te tan zau zawka inpho chhuah theihna tur remchanna leh marketing lama hmasawnna a thlen ngei a beisei thu a sawi bawk. BANERGISE seminar-ah hian mahni kutkawiha thil siam chhuak eng emaw zatin an thil siamte an pho chhuak a; chawhnuah technical hun hman a ni.