Lunglei leh Sihphira MPC-te'n ZPM an zawm vek lo - MPC

MPC hruaitute chuan nimin khan Aizawl Press Club-ah thuthar thehdarhtute an kâwm a; MPC Lunglei Sub-Headquarters leh Sihphir group pumpuiin ZPM an zawm anga thu thehdarh chu belhchian dâwl lo niin an sawi.

MPC general secretary VL Ṭhazova chuan, Lunglei Sub-Hqrs. MPC president, general secretary pakhat leh secretary pahnihin ZPM an zawm thu sawiin, "MPC Sub-Hqrs. ṭhiah leh awm tawh lo ang hiala thuthang hi thu dik lo leh rintlak loh a ni. Anni bak member dang zawngte chu rinawm takin MPC-ah an la awm zel a, MPC Sub-Hqrs. hi vice president Zokhuma kaihhruaiin dan pangngaiin kalpui mek a ni," a ti.

VL Ṭhazova chuan, Sihphir group MPC-te ZPM-ah an inchhûng lut anga thuthang pawh a dik tluantling lo nia sawiin, "Member zingah mimal duh thlannaa ZPM-a lut awm mah se, group anga inlet an ni lo," a ti a; member tam zawk chu MPC-ah an la awm niin a sawi.

Independent MLA ṭhenkhat leh ZPM hruaitu ṭhenkhatte'n MPC chhiatna tur leh mipuite bum nan thudik zîktluak lo hmangin hma an la ṭhin nia sawiin VL Ṭhazova chuan, "Hei hi MPC chuan pawi kan ti a, kalphung thar tia mipuite zirtira au ṭhinte tih atan a âwm lo kan ti. MPC dintu president Brig. T Sailo vision tihlawhtling turin a fapa Pu Lalhmangaiha kan ring tawk a ni," a ti.