BHA memorandum enfiah tumtu MPYCC leh police-te CMO bulah an innawr

Congress party ṭhalai, Mizoram Pradesh Youth Congress Committee (MPYCC)-te chuan Bharat Hitaraksha Abhiyan (BHA) intite'n Chief Minister hnena memorandum an thehluh enfiah tur leh BHA-te nihna hriat chian tumin nimin khan Chief Minister's Office (CMO)-ah kal an tum a, gate-ah police-te'n lo dangin, rei vak lo an innawr hnuah an ṭîn.

CMO gate bula thu sawitu MPYCC president Dr Lalmalsawma Nghaka chuan, BHA-te nihna dik tak puangzar turin sorkar an phût thu a sawi a, "BHA-te zalen taka lo luta CMO tuala an sapatâl thei hi MNF sorkar hian an hriatpui ngeia tih a nih kan ring. September 6, 2019 khan Hindu kulmûk pawl hi Tripura aṭangin Kanhmun police paltlangin Mizoramah an rawn lut a, hei hi Mizoram sorkar hian a hre lo thiang lo. BHA hian Mizoram sorkar hnuaia district magistrate hnenah an kal tur thu hi lehkhain an hrilh hmasa a ni," a ti.

Dr Lalmalsawma chuan, BHA-te chuan September 7, 2019 chhunah CMO tualah duh tâwkin lungawi lohna an lantir thei tih sawiin, "Bru ráltlânte thlavâng hauha Mizoram leilung fate duh loh dana thutlukna siamtir tumtute zalên taka an rawn kal laiin, keinin kan ram, hnam leh sakhua himna tura hma laa tharum thawh loa CMO-a kal tumte min dang tlat thung a ni," a ti a; Mizo ram, hnam leh sakhua himna tura hmalak tumtute dan an ni chu ná an tih thu a sawi.

MPYCC tarlan danin, BHA hi Rashtriya Swayamsevak Sangh (RSS) nena inthlunzawm an ni. Mizorama lût tura Inner Line Permit (ILP) an neih dan leh ILP sponsor-tu te, an lo kal chhan leh Chief Minister hnena memorandum an thehluhte chu Mizoram sorkarin a thup tlat a ni.

BHA-te chuan Mizorama an luh hmain Tripura-a Bru refugee camp an tlawh a, Twitter hmangin prime minister Narendra Modi hnenah chhe takin Mizo mipui an hêk a ni. 'Pu Prime Minister, Mizoram Kristiante vanga tuartu Bru-te dinhmun hi a rapthlak hle. Anmahni hi Hindu an ni a, an dinhmun hi kan hriattir a che,' tiin, an zinga mi Dharmadhikari Singh chuan Prime Minister a hrilh a ni.

MNF party chu nationalism sawi chiam ṭhintu an ni tih sawiin MPYCC chuan, MNF hian BJP an thawhpui tâk avangin Mizorama thleng ngai lo RSS kaihhnawih an rawn huangtau ta tih an tarlang a, "BJP laka dawl zawra zawr MNF hian Zophai ramri chungchangah pawh engmah an ti thei ta lo. 'Pathian leh kan ram tan' titute sorkarna hnuaia Mizorama kan hotupa ber CM office tualah ngei MNF-te thawhpui BJP mi leh sate ngampa taka an rawn chetla ta mai khan MNF leh BJP-te nghet taka an inphiar zawmzia a tarlang a ni," an ti.