KHAWTHLIR
Governor leh DGP
Mizoram director general of police (DGP) thar SBK Singh chuan nimin khan Raj Bhavan-ah Governor Prof. Jagdish Mukhi a hmu a, Mizorama police hnathawh leh hmalakna hrang hrangte an sawi dûn. SBK Singh hian August 8, 2019 khan Mizoram DGP hna a zawm a, Mizorama a awm hmain Arunachal Pradesh-ah thla 16 chhung DGP hna a thawk a ni.
Phalna nei loa Oil zawrh khap
Aizawl district Sub-Divisional Magistrate chuan Cr.PC Section 144 hmangin thupek a chhuah a, Aizawl khawpuiah phalna nei loin petrol leh diesel zuar phal a ni loh thu leh, a zuar luite chu IPC Section 188 hmanga hrem an nih tur thu a puang. Magistrate tarlan danin, Mizoram Motor Spirit and High Speed Diesel (Prevention of Malpractices in Supply and Distribution) Order 1992 Section 5 leh Essential Commodities Act, 1955 Section 3(2)(c)(d) kalhin an zuar tih hriat a ni.
Cleanliness drive
Mamit College chuan Internal Quality Assurance Cell leh National Service Scheme (NSS) bultumin nimin khan adopted village atana an thlan Vawngawnzo khuaah Cleanliness Drive an buatsaih a, primary school leh middle school hmunhma an tifai.
Internet zirho
Pachhunga University College-a Department of Statistics chuan September 11, 2019 aṭanga nimin thleng khan an college-ah 'Sensor networks, internet of things and internet of everything' tih thupui hmangin national workshop an buatsaih. India ram hmun hrang hranga senior scientist rual an tel a; information technology leh internet kaihhnawih thil chi hrang hrang zirho a ni.
MAHFED seminar
Mizoram Agriculture Horticulture, Forestry & Marketing Corporative Federation Limited (MAHFED) chuan nimin khan Siamliana Hall, Mamit Venghlunah seminar an buatsaih a, thupui chu 'Innovative & programmatic ideas on adaptable development approach for rural marketing class' tih a ni. Technical officer Dr Lalhmingsanga'n kut hnathawktute tana ṭangkai tur thil hrang hrang a zirtir a ni.
Anthurium Festival sawiho
State Level Organising Committee for Anthurium Festival 2019 chu nimin khan an chairman Robert Romawia Royte, Tourism minister hoin a pisaah an ṭhukhawm a; October 4-5, 2019-a Anthurium Festival hman dan tur an duang. An rêl dan chuan, festival ṭan ni-ah Tourism Minister khuallian a ni ang a, a ni hnihnaah khuallian turin Chief Minister beisei a ni.