Sorkarin raw chìn leh sâwngbâwl hmangin eizawnna ṭha zawk siam a tum - F Lalnunmawia

Horticulture Development Board vice chairman Prof. F Lalnunmawia, MLA chuan nimin khan Mizo Hnam Rúna inkhawmah thu sawiin, Mizoram sorkarin raw chìn leh sâwngbâwl hmangin eizawnna ṭha zawk siam a tum thu a sawi.

Prof. F Lalnunmawia chuan, MNF kaihhruai sorkarin raw chìn leh sâwngbâwl hmangin eizawnna ṭha zawk siam an tum nia sawiin, "Raw lian chi Dendocalamus brandisii leh Dendrocalamus latiflorus-te chìn tum a ni a, sorkar hmalakna pawimawh tak a ni dawn. Heng ruate hi lian thei tak an ni a, a laia hawlh tlangin inchi 7-8 te an ni thei a, kum 5-6 velah a puitling thei a ni," a ti.

Hun kal tawhah raw chi hrang 10 chu state dang aṭanga lak luh a ni tih sawiin F Lalnunmawia chuan, "Duhthu an sâm lo hlawm hle. Tuna mi hi chu kan hlawhtlinpui ngei ka ring. Heng ruate hi bamboo ply atan ṭha tak a ni a, in sakna, in chhung cheina leh furniture chi hrang hrangah an ṭha hle a, kuang siamna atan pawh  kan hmang ṭangkai hle ang," a ti a; chutih rualin, Mizorama mau awm sate pawh ṭangkai zawka hman dan tur Bamboo Development Board-in an ngaihtuah zel dawn niin a sawi.

Prof. F Lalnunmawia chuan, MNF sorkar hun rei lo tê chhungin chief minister leh minister-te hnathawhah lawmna tur tam tak a awm nia sawiin, CM Zoramthanga'n sorkar laipui a dawrnain rah ṭha tam tak a chhuah a rin thu a sawi a, "Board leh department-te'n project proposal-te siamin kan bawhzui ang a, SEDP hmangin mipui mimir thleng phak hmasawnna kalpui kan tum a ni," a ti.

Aizawl South-III bialtu MLA chuan, mi ṭhenkhatin MNF party leh CM Zoramthanga te chu BJP hlau anga an sawi chu a dik lohzia a lang zel dawn nia sawiin, "NEDA meeting-ah CAB kan duh lohzia a sawi kha Mizo mipui tan a din nghehzia a lang. NEC meeting-ah Mizoram leh NE state-te tana pawimawh tak tak a sawi kha official-te pawhin an fak hle a ni," a ti a; NEC meeting-a hmarchhak CM zawng zawngte thusawi zingah Mizoram CM thusawi a lâr fál hle niin a sawi.

Mizoram Planning Board vice chairman H Rammawi pawhin thu sawiin, CM Zoramthanga'n tun hnaia sorkar laipuia hotu hrang hrang a dâwr chungchang a sawinaah, 'vaw dûp' tih ṭawngkam a hmang chu thiam a tih thu a sawi a, "Sorkar laipuia sum dil chhuak tur chuan dil hmasak phawt a, concept paper-in a zui a ngai a, an lo pawm a nih chuan detail project-in a zui leh a ngai. DPR an pawm hunah sum kan hmu dawn chauh. CM-in 'vaw dûp' tih ṭawngkam a hman khan a sawifiah ṭha hle a ni," a ti.