Kuthnathawktute tan pension scheme kalpui tum a ni - Agriculture Minister

C Lalrinsanga chuan kuthna­thawktute tan SEDP kal tlangin chak taka hmalak  tum a nih thu sawiin, "Hemi atan hian sorkarin Agriculture Devolopment Board pawh a din fel tawh. Buh leh bala intodelh hi kan tum ber pakhat a ni. Kuthnathawktute harsatna tawh ṭhinte chhawk zangkhai turin Farmers Crop Insurance kalpui ṭan a ni a, a bulṭan nan thlai thlan chhuah bik ṭhenkhatah kalpui phawt a ni ang," a ti.

Agriculture Minister chuan sorkarin kuthnathawktute tan pension scheme kalpui a tum thu sawiin, "Kum 18 leh kum 40 inkarte tana ruahman rih phawt a ni dawn," a ti a, a chhawrtu an tam theihna turin kum bithliah pawh hei aia huapzau deuha kum 50 ral kai tawhte pawhin an chhawr ve theih dan tur kawng zawn leh tum a nih thu a sawi.

C Lalrinsanga sawi danin, Farmers' Pension Scheme atan hian kuthnathawktute'n pawisa thla tin Rs. 55 aṭanga 200 inkar pek a ngai dawn a, kum 60 an tlin thleng an pek chuan kum 60 an tlin hnuah thla tin Rs. 3000 an dawng thei dawn a ni

Ram changkang zelah che­mical fertilizer hmanga thlai tharte thinhrikna a lian chho zel tih sawiin Agriculture Minister chuan, "Chumi thlakna tur chuan bio-fertilizer leiṭha kan thlaichinten a ngeih em em tur heti lama mithiam bikte nen siamchhuah hna kan thawk dawn. Hemi atana hmalakna tur hian sorkarin cheng vbc. 1.7 a ruahman tawh a ni," a ti.