AMC-in polythene an vâi leh dawn

Aizawl Municipal Corporation (AMC) chuan Aizawl khawpui chhunga plastic bag pan, micron 50 aia pante a khapnaah plastic bag (polythene) an mansak hnua polythene vai hna an thlahdul hret a, vawiin lam aṭangin plastic bag pan chite vai ṭan leh an tum.

AMC commissioner Dr H Lalthlangliana'n Vanglaini palai zawhna chhangin, AMC-in August 1, 2019 aṭanga Aizawla plastic bag pan chi a khap ṭan hnuah, August 26 aṭangin khauh zawkin a keng­kawh a, Aizawla dawr hrang hrangte vaiin, plastic bag micron 50 aia pante an mansak. Hlawm lian deuh hleka dawrkaia polythene an vai chu ni hnih an kalpui hnuah, an inthlahdul leh deuh a ni.

Dr H Lalthlangliana chuan, August 26 aṭanga dawrkaite AMC-in an endiknaa polythene an mansak zat chu 36,000 chuang a nih thu a sawi a, "Chawlhkar lo awm leh tur aṭangin a hlawm lian deuhin dawrkaite kan endik leh ṭan dawn a ni," a ti.

AMC hotute chuan, kar leh aṭanga Aizawl khawpui chhunga dawrkai hrang hrangte an enfiahna turah hian AMC ward zawng zawng tuam chhuah an tum thu leh uluk zawka enfiah an tum thu Vanglaini an hrilh. Aizawla veng tam takah mipuite'n bawlhhlawh ṭawih thei leh ṭawih thei lote an thliar hrang tawh tih sawiin AMC hotute chuan, "Bawlhhlawh ṭawih thei lo, plastic bag an paihte chu bawlhhlawh dang nen kan paih pawlh vek tawh lo a, a hranpain kan dah hrang a; chu'ngte chu lei duh an awm ṭhin avangin a lei tur zawn nan tender kan chhuah dawn mek a ni," an ti.

AMC-in plastic bag a khap chin, micron 50 aia pante zing­ah Aizawl leh khaw danga mipuiin an hman tlánglàwn zawng zawng a tel deuh vek a, rambo polythene ang chi te, garbage bag-te pawh a tel. AMC mayor PC Lalhmingthanga'n plastic bag khap ṭan a nih dawna press mite a kawmnaah, Aizawl khawpuiah chhungkua 67,594 vel an awm thu leh AMC-in bawlhhlawh a lâk khawm chu ni tin metric ton 159.8 vel a nih thu te, bawlh­hlawh zingah plastic lam chi a tam thute a sawi tawh. AMC zir chianna aṭangin, Aizawl khawpuiah plastic lam chi ni tin quintal khat vel hmang ziah ang a ni.

Sorkar laipui chuan plastic lam chi hman nasat pawizia a hriat avangin September 2018 khan urban local body-te hnenah lehkha thawnin, October 2, 2019 aṭangin plastic hman lohna khawpuia puang vek turin a hriattir a; AMC Board of Councillor meeting pawhin Aizawl chu Plastic Free City ni turin a lo rél tawh bawk.