Chief Minister leh Sports Minister hnungthak inhiahsak tawnah MPCC-in an puh

Mizoram Pradesh Congress Committee (MPCC) Media depart­ment chuan September 14, Inrinni khan Aizawl Press Club-ah thuthar thehdarhtute an kawm a, Chief Mi­nis­ter leh Sports minister Robert Romawia Royte inkarah hnungthak inhiah sak tawnna a awm thu an sawi.

MPCC Media dept. secretary C Lalhriatpuia chuan Sports Minister chu minister dangte thal theih loh thal theitu nia sawiin, "Budget session lai ngeiin CM chan Finance department-a united fund aṭangin cheng vbc. 11 a lo dawng tawh a ni. CM leh Sports Minister inkarah hian hnungthak inhiah sak tawnna a awm ngei ang tih MPCC chuan a ring tlat. Minister dangte department chana sum hman bang (NEDP, etc) awmte pawh CM nen inthurualin an hmansak duh zel ang tih kan ring," a ti.

C Lalhriatpuia chuan MNF sorkara dy. CM chu Tawnluia nimah se, dy. CM thuneihna tak tak kawltu chu Robert Romawia nia sawiin, "MNF party-ah senior zawkte leh 'Vangvat kaite' hlutna a tlahniam ta. MNF sorkarah hian dy. CM chu Tawnluia a ni a, UDPA, PHE leh DPAR-te a chang a, mahse damlohna avanga hun eng emaw chen a inenkawl chhung khan a hming lang siloin a department chan aṭanga sum cheng vbc. 14 zet chu Pu Robert Romawia'n a rel sak," a ti a, Tawnluia tan a mualphothlak thu a sawi.

C Lalhriatpuia sawi danin, January 24, 2019 khan Sports Minister hian Chief Minister hnenah lehkha ziakin UDPA department sum hman bang awm aṭangin project pahnih (Improve­ment of Zemabawk Football Ground, Aizawl  leh Laying of Artificial Football Turf at Mual­vawm, Khawzawl) thawh nise tiin rawtna a thlen a, CM chuan UDPA Secretary hnenah 'he rawtna ang hian lo ti ta che' tiin a ziak a ni. 

UDPA department chuan March 29, 2019 khan cheng vbc. 14 senna tur heng project pahnih tan hian administrative approval & expenditure sanction a ti chhuak a ni. UDPA pawisa hmang hian High School Field, Zarkawta football field chhawng siam na tur chungchangah pawh a changtu minister Tawnluia hming a lang lo.