Kolasib DC leh MJA-te an inkawm

Inrinni khan Kolasib DC Zoengsanga leh MJA member-te Kolasib Circuit House-ah an inkawm. Kolasib DC chuan an district hmasawnna atana theihtawp chhuah a tum thu a sawi.

Zoengsanga chuan an district tana ṭha tur nia a ngaihah chuan huai takin hmalak zel a tum thu sawiin, "Ramri hrula awm kan ni a, buaina neuh neuh a tam ṭhin avangin duh angin hmasawnna hna thawh a theih ṭhin loh. Kan district chhunga hmasawnna hna a chhiat leh a ṭhatah DC kan nih angin ka mawhphurhnaah ka ngai. In mi fin chhuah fo ka mamawh a ni," a ti.

MJA Gen. Headquarters president Zonunsanga Khiangte chuan buaina eng emaw a awm a, midang tir mai loa a kal ṭhin avangin Kolasib DC a faka, "District danga DC te pawh hian an aiawh te tir mai lo hian, an mahni ngei an kal hian awmzia a neih thui zawk zia hriain entawn se kan duh hle a ni," a ti a, ram leh hnam tana a hmalak ṭhinaah Kolasib DC chu fakawm a tih thu a sawi.

Inkawmhonaah hian MJA Gen. Headquarters vice president Lalremsiama leh Kolasib District MJA president R Lalhmingthangate pawhin thu an sawi a ni. Kolasib DC hi election officer Vanlalchhuanawma Chawngthu, SDC Hmingmawizuala leh DIPRO Collin Hlychho-te'n an ṭawiawm.