Sik leh sa chungchangah legislators' dialogue buatsaih

September 14, 2019 khan Assembly Annexe conference hall-ah climate change adaptation chung­changah legislators' dialogue buatsaih a ni a, chief minister Zoramthanga'n a hmanpui.

Chief Minister chuan khaw­vel pum huapa mihringin hmasawn tuma a kal zelnaah sik leh sa inthlak dan tur pangngai aia nasain boruak a inthlak tih sawiin, "Mihring nunphungah nghawng ṭha lo zawk a thlen chho zel a ni. Hei hi sorkar ang zawng pawhin hmasawnna tur ruahmanna hrang hrang duan naah ngaihpawimawh tel a ṭul. Sik leh sa inthlak dang­lam tur belhchhah leh boruak tichhe zual thei tur hmalakna laka fihlim tum a pawimawh," a ti.

Speaker Lalrinliana Sailo pawhin thu sawiin, "Sik leh sa inthlak nasa in tunhnaia mihring nunphung a nghawng chhoh zel dan thlir reng chungin Mizoram chuan National Action Plan on Climate Change (NAPCC) zulzuiin State Action Plan on Climate Change (SAPCC) a buat­saih a ni," a ti a, sorkar poli­cy SEDP hnuaiah SAPCC thiltumte hi telh a nih thu a sawi.

Thusawitu dang Environment, Forest & Climate Changte minister TJ Lalnuntluaga chuan sik leh sa inthlak in kawng hrang hranga ram a nghawng theihna tura insiamrem tura hma an lak dan "SAPCC hnuaiah agriculture, Sustainable Himalayan Mission, green mission, sustainable habitat, health, solar, mission and renewable energy sector, energy efficiency, water leh strategic knowledge mission-ahte hmalak tum a ni," a ti.

Inkhawma tarlan a nih dan­in, sik leh sa inthlak danglam avangin kum 2015 aṭanga 2017 chhung khan Mizoram pum fo­rest cover, ramhnuai zau zawng chu sq. km. 562 in a tlahniam a, natna hrang hrang - malaria, deng­ue, bird flu, etc. te chu a hmaa a awm lohnaah tepawh khua a lo lum zel avangin a lo awm theih phah a ni.