MNF ṭhalaiin CM pisa luhkhung tumah Congress ṭhalai an puh

MNF ṭhalaite chuan thuchhuah siamin, Congress ṭhalaite chu September 13, 2019 khan chief minister pisa luhkhung tumah an puh a, "Congress ṭhalaite hi kan dem hle," an ti.

CM pisa chu lungawi lohna lantirna hmun a nih loh thu tarlangin MNF ṭhalaite chuan, "Bharat Hitaraksha Abhiyan (BHA) intite'n lungawi lohna lantirna atana an hmang pawh tih tawh nak a laiin, a belhchhah tura Congress ṭhalaite an rawn pen chhuak leh ta mai hi ram rorelna tihbuai tumna niin kan hria a, kan dem hle a ni," a ti.

September 13, 2019 kha Congress president Lal Thanhawla corruption thil avanga a court kal ni a ni a, hemi boruak thup tum nan boruak dang an siam mai niin a lang. Hawla hi nimin khan Ser­chhip District Court hmaah koh leh niin a thubuai kal lai mek chu Section 313 of Code of Criminal Procedure (CrPC) hnuaiah Court chuan accused hi zawhnate zawh a nih hnuin tun September 27 khian final hearing neih tura tih a ni.

Congress ṭhalai hian office-a inluh­chhuaha tharum thawh hi tun hma aṭang­in an lo ching ṭhin a, an boruak a daih deuh chang hian intuaithar nan tharum an chelek ṭhin niah kan ngai. Hetianga office pawimawh luhchhuaha tharum thawha che ṭhin an nih avangin CM office-ah pawh luhtir chi niin a lang lo a, police lamin lo dang lo phei sela chu engtiang takin nge CM office-ah an chet ang tih ngaihtuah ngam a ni lo.

Bharat Hitaraksha Abhiyan (BHA) intite hi Congress fuihpawrha che an nih kan ring a; Congress ṭhalai thuchhuah (No. MPYCC/Mz-B/2019/PR-23 Dated Aizawl the 13th September, 2019)-a PM hnenah Mizote min hektu nia an tarlan twitter account pawh tun thla, September maia siam a nih avangin an fake account a nih kan ring hial a ni.