Internet kaltlanga bill pekna hawng

Tlangzarh inkhawm hi P&E secretary Lalzirmawia Chhangte-in a kaihruai a, P&E engineer-in-chief C Lianlunga'n technical report a pe a; BBPS leh MPOS hman dan inhrilhfiah nghal a ni. Minister R Lalzirliana chuan, mipui tana awlsam zawk leh hun heh lo zawka bill pek theihna Mizorama hman a ni thei tur chu hmasawnna a nih thu a sawi a; smart meter hmang tura inpuahchah mek a nih thu sawiin, "A hlawhtlin hunah meter reading dik loh vanga mipui harsatna tawh ṭhin a kiam theih ngei beisei a ni," a ti.

BBPS kaltlanga bill pek theih Reserved Bank of India (RBI)-in a pawmte chu - electric bill, tui bill, telephone/mobile phone bill, gas bill leh dish TV direct to home (DTH) bill-te a ni. BBPS platform hmang hian school/college fee, insurance, mutual fund, chhiah chi hrang hrang, credit card bill-te pawh pek theih tura siam a la ni dawn tih P&E department hotute chuan an sawi.

Electricity bill chu pek theihna chi hrang hrang a awm a, www.powermizoram.gov.in portal-ah lutin a pek theih dawn a, mobile application hrang hrang BHIM UPI, Paytm, Phonepe, GPay leh channel dang BBPS nena thlun zawm bank leh non-banking institution-te hmangin a pek theih a; common service center aṭangin pek theih a ni dawn bawk.

MPOS hi swipe machine (credit card/debit card) hmanga bill pekna tur a ni a, Ezetap leh HDFC Bank-te ṭangkawpin bill pekna tur khawl P&E department an tumsak. Consumer-te'n an consumer number hmangin an bill chungchang an hre thei dawn a, khawpui chhunga consumer-te chuan card hmangin bill an pe thei nghal dawn a, receipt pawh an dawng nghal ang. Thingtlang kilkhawr lama hman tur pawh pawisaa (cash) pek theihin siam tel a ni.

1.    Electric bill pe duh tan counter-ah intlar a ngai tawh lo ang.

2.    Consumer tan payment channel an hman azirin incentive/cashback offer a awm thei dawn a, bill thar a chhuah hunah message-in an hriattir dawn.

3.    Engtik hunah pawh, khawi hmun aṭang pawhin bill pek theih a ni ang.

4.    Payment system-in inkaihhruaina mumal tak a neih avangin mipui tan a rintlak a, online-a bill pek hi a felfai lo a nih chuan ni hnih/khat hnuah consumer portal aṭangin en chhuah leh vek theih a ni dawn.

5.    Rang zawka electric bill sem chhuah leh êng chhit mante lak luh a nih chuan nasa takin electric hman ral leh luang ral a tlem phah beisei a ni. Aggregate technical & commercial loss nasa takin a tlakhniam phah dawn a, sorkar sum hmuh (revenue) nasa takin a pun ngei beisei a ni.