Road & Infrastructure Development Board Chief Minister hoin an ṭhukhawm

Mizoram sorkarin board a din tharte zinga pakhat, Road & Infrastructure Development Board chuan nimin khan an chairman Zoramthanga, chief minister hoin Chief Minister's Office meeting room-ah a vawi khat nan an ṭhukhawm a; Board hmalak dan tur ruangám an duang.

Road & Infrastructure Development Board-ah hian H Lalzirliana, MLA chu vice chairman a ni a, PWD secretary JC Ramthanga, secretary to CM chu member-secretary a ni. Finance department, Planning & Programme Implementation leh Urban Development & Poverty Implementation department-a secretary ṭheuh te, PWD Engineer-in-Chief, Aizawl Municipal Corporation Mayor, UDPA Director leh member dang paruk an awm.

Chief Minister chuan, hnathawh vil leh en zui (monitoring) ngaih pawimawh ṭul a tih thu sawiin, "Kawng hi hmasawnna hnukpui a nih avangin hmasawnna ruangám dangte din hlawhtling tur chuan inkalpawhna kawng ṭha neih hmasak a ṭul," a ti a; ruahtui hul veleh kawng khuar hnawhkhah leh tihmâm ngai laite tihmâm hna, patching thawh thuai a nih tur thu a sawi.

Meeting-ah hian kawngpui thar siam leh enkawlna lam te, infrastructure asset dang mamawh din turte leh sum hmuhna tur (funding source)-te thlithlai a, project siamin, hna thawh hnuah pawh mumal taka en zui chu Board kut a nih thute sawi a ni.

Nimina meeting-ah hian Planning Board vice chairman H Rammawi, adviser to chief minister C Lalramzauva leh Board member dangte an tel a ni.