India rama ruihhlo ngaite enkawlna lian ber nei tura hmalak mek a ni - Dr K Beichhua

Social Welfare minister Dr K Beichhua chuan nimin khan Dinthar Veng Joint Action Committee (JAC) din Gilgal Halfway Home a hawng. Minister chuan, India rama ruihhlo ngaite enkawlna lian ber nei tura hmalak mek a nih thu a sawi.

Dr K Beichhua chuan, India rama ruihhlo ngaite enkawlna lian ber neih chu thil chhuanawm a nih loh thu sawiin, "Kan ramin a mamawh avangin nei turin sorkarin SEDP hnuaiah hma a la mek. A thawh khatna atan mi 490 dah theihna tur siam tum a ni a, sub-committee hrang hrang indinin hmalak mek a ni," a ti.

Ruihhlo do leh ruih­hlo ngaite enkawl tura mawhphurhna sang tak sorkarah a chang chu a insit ṭhin thu sawiin Social Welfare Minister chuan, "Ruihhlo do kawnga theihtawpa inpe, NGO te, ruihhlo ngaite enkawl ṭhin Samari mi

ṭha awm ṭhinte'n chakna thar min pe ṭhin," a ti a; ruihhlo do kawngah party hrang hrang te, kohhrante leh NGO-te ṭangrual taka ke pên a ngaih thu a sawi.

Khualzahawm Lalruat­kima, IPR minister pawhin thu sawiin, "Khawvel thiamna sang zelah hmâna ruihhlo ngaite misual kan tih ṭhin kha damlo tih an lo ni ta a, khawtlang hruaitute'n ruihhlo ngaite enkawlna tur an buatsaih hi a Pathian thu hle a ni," a ti.

Dinthar Veng hian ruihhlo do kawnga hma an lakna leh ruih­hlo ngaite enkawl atan kum 1998 khan Coun­celling Board an din a, ruihhlo ngaite nun kawng kaihhruaina an lo thawk tawh. Kum 2000 khan mi tlawmngaite sum thawh khawm aṭangin Halfway Home tiin counselling leh dres­sing clinic an din tawh a ni.