'Mizoram tana thil ṭha lo chu ka do zel ang' tih hi ka dinna a la ni reng - C Lalrosanga

Mizoram aṭanga Lok Sabha MP C Lalrosanga chuan nimin khan Mizo Hnam Runa inkhawmah thu sawiin, Lok Sabha inthlan campaign laia a sawi ṭhin, 'Mizoram tana thil ṭha lo chu ka do zel ang' tih chu a dinna a la ni reng tih a sawi.

C Lalrosanga chuan, Lok Sabha MP a nih hnu lawkah Parliament session an nei nghal tih sawiin, session chuan thla thum chhung a awh tih a sawi a, "BJP lam an tam thamin min hneh si a, an bill put luh kan duh loh deuh pawh min pass hnan zel a, mahse, Mizoram tana thil ṭha lo tur chu a awm lêm lo a, kan pawm záwng chu kan pass pui ve tho bawk," a ti.

Parliament-ah Coal & Steel Commitee-ah dah a ni ve tih sawiin C Lalrosanga chuan, "Lok Shaba-in a ruat committee 16 zingah min dah ve a, duh thlanna chu kan pe ve nachungin, duh thlanna ang diak diakah min dah lo," a ti a; Parliament session chu state assembly ang thoin, ṭhut tama hlawh tam a nih rualin, session chhungin Mizoram sorkar tana thil pawimawhah chuan session a ṭhulh zeuh zeuh thu a sawi.

Mizoram MP chuan, Parliament-a thu sawi turin Speaker hnenah notice (hriattirna) pek hmasak a ngai tih sawiin, "Vawi thum lai ka pe chungin thusawi tur chuh an tam em avangin hun min pe ve ta lo. Ka sawi tum ber chu 'J&K chungchang sawinaah, Article 370 in hlih chuan, Mizoram leh hmarchhakah Article 371 hi in khawih lo ang tih min tiam rawh u' tih a ni," a ti. Union Home Minister-in Article 371 ṭhiah chu a hlauhawm lo tih Parliament-ah a puang chunga Mizoramah hlauthawng an la awm chu mak a tih thu a sawi bawk.

C Lalrosanga chuan, tun hnaia NEDA meeting-ah chief minister Zoramthanga ṭawiawmin a tel ve tih sawiin, "Home Minister-in Article 371 an khawih dawn lo tih a sawi nawn leh. Khami ṭuma kan Pu Zoramthanga'n CAB chungchang a sawi kha, a ṭhain a sawi huai berin ka hria," a ti.