CM-in mau/rua ringawt a buaipui - ZPM Vice President

Zoram Peoples' Movement (ZMP) vice president Dr Kenneth Chawngliana chuan nimin khan an party pisaah thu a sawi a; chief minister Zoramthanga chu mau/rua ringawt buaipuiah a puh. 

Dr Kenneth Chawngliana chuan, sorkarin programme pui, thlûr bing an neih ṭhin thu sawiin, "MNF sorkar pawh hian SEDP kha an programme pui berah neih turin an zuar a ni. An sorkar ta a, Chief Minister chuan mau/rua ringawt a buaipui a, a hote tumah hian an tuipui lo a nih hmel, sawi ve duh pawh an awm lo hi a mak hle. Kan sorkar hrawn mek hian kalphung mumal a neih a hun ta hle a ni," a ti.

Eng sorkar pawhin hunbi neiin an thawh tawh chin puan tur an nei ṭhin tih sawiin ZPM Vice President chuan, "Kum khat chhunga hna thawh te, ni 100 chhunga hna thawhte chhuanawm tak tak puanzar tur an nei ṭhin," a ti a; MNF sorkarin kum khat la tling lo deuh ro an rêl chhunga an thawh langsar deuhte chu - MIMER hming thlak te, MPSC thuneihna chhuhsak te, sorkar hnathawk tura party mi lak chiam te, CM huana mau ṭiak 3,000 vel phunte a nih thu a sawi.

Kenneth Chawngliana chuan, ramri humhalh kawngah te, dan loa lo lut foreigner dan kawngah te, Bru lo kîr dan turah te, ILP khauh zawka kenkawh kawngahte leh ruihhlo do kawngahte sorkar thil tih dan chu a thlamuanthlak lo tak zet tih a sawi a, "Tlawmngai pawlte pawhin chêt ngaihna an hre ta meuh lo niin a lang. Tun ang renga kan kal chuan, ram kan hloh ang a, kan hnamin ral lam a pan mai dawnin a lang," a ti.

ZPM adviser Paul Remthanga chuan, ZPM chu Pathian remtih zawnga an inkaihhruai phawt chuan Mizorama rorel turin Pathianin a dah ngei tur thu a sawi a, "Kalphung hlui kan hmuh tawhte ang thoa kal tur kan nih a, an duh ang kan duh a, an tih ang kan tih ve dawn chuan, Pathian hian kan kutah ram rorelna hi a dah hauh lo ang," tiin, Pathian duh zawng ngaihtuah a ṭul thu a sawi.