KHAWTHLIR

NEET 2019-a tlingte tan Mizoram state quota-a Bachelor of Homeopathic Medicine and Surgery (BHMS), Bachelor of Ayurvedic Medicine and Surgery (BAMS) zir duh tan seat a la awm a; dil duh chuan September 19, 2019 thleng Higher & Technical Education Joint Director (Tech) office, Chaltlangah zawhfiah theih a nih thu, sorkar thuchhuah chuan a tarlang.

KVK, Siaha district chuan nimin khan Siahaah Skill Training of Rural Youth hnuaia ṭhalai mi 15 hnenah changpât hmanga lei­ṭha siam dan (vermicomposting) zirna an buatsaih ṭan a, ATMA project director Elizabeth Khaimichho-in a hawng. Training hi ni sarih awh tur a ni a, mithiam hrang hrangin an zirtir dawn a ni.

Minister Dr R Lalthang­liana chu September 14, Inrinni khan Imphal, Manipur-ah Mizo zirlai pawl, All Mizo Medical Students Union hruaitute nen an inkâwm a, a ṭul anga an hman atan Rs. 10,000 a pe. Pathianni khan Guwahati Mizo Welfare Association leh Guwahati Mizo Students Union hnenah Rs. 10,000 ve ve a pe bawk.

Ramria chêngte dâwmkânna tura sorkar laipui duan - Civic Action Programme hnuaiah Border Security Force (BSF) first battalion chuan nimin khan Tlabung chhehvelah thilpek chi hrang hrang an sem. BSF-te hian ṭhut­thleng leh zirna atana an mamawh hmanrua chi hrang hrang te, infiamna bungrua, tui thianghlim vawn ṭhatna leh thawmhnawte an sem a ni.

Minister of state K Lalrinliana chuan nimin khan Kolasib DC conference hall-ah Kolasiba officer-te a kawm a, ruahmanna felfai tak siama sorkara thlen ṭhin turin a chah a, a theihna zawnah hma a lakpui ṭhin tur thu sawiin, "Kolasib khawpui chhungah kawng hrang hranga kalphung felfai zawk a awm theih nan Town Planning and Development Committee kum 2005 a din chu tha thara kalpui a ni ang," a ti.