Dr Thangtea'n Guwahati damdawi-inte a tlawh

Health & Family Welfare minister Dr R Lalthangliana chuan September 15, Pathianni khan Guwahati khaw­puia Mizoram sorkarin a pawmpui damdawi-in (empanelled hospital) pasarih a tlawh a, damdawi-in hotute nen an inkâwm.

Health Minister-in damdawi-in a tlawhte chu - Excel Care Hospital, Shri Sankaradeva Nethralaya (SSN), Apollo International Hospital, Downtown Hospital, GNRC Hospital, Dr B Baruah Cancer Institute (BBCI) leh Pratiksha Hospital-te a ni.

Damdawi-in hotute hnenah Dr R Lalthangliana chuan, natna bik neite enkawlna atana an thiamna bik (speciality) an neih dan a zawtfiah a; cardiology, neurology leh cancer enkawlna lam a thiamna bik neite chu Mizoram tan an ṭangkai leh zual tur thu a sawi.

Minister chuan, Mizoram sorkar empa­nelled hospital-te chu Mizoram aṭangin mi rethei zawkte leh sum leh pai nei lote leh, ṭawng thiam loh vanga mahni natna pawh sawi thiam lo te, kalpuitu ṭha nei lote'n inenkawl turin an pan ṭhin tih a sawi a; Mizo damlote chu hriatthiamna thui tak nen lo enkawl a, Mizoram nen hun rei tak an lo thawhho tawhnate avangin duhsak taka ngaihhnathiamna nei turin a ngen.

October 1, 2019-a Mizoram State Health Care Scheme thar hman tur chungchangah R Lalthangliana chuan, ṭha taka lo dawngsawng a, theihtawp chhuaha Mizoram sorkar thawhpui zel turin a ngen a; gold card neite'n damdawi-in ṭhenkhata an harsatna tawhte sawi langin, a chinfel dan kawng dappui turin a chah.

Health Minister chuan, Guwahati leh Aizawl inkarah direct flight a awm tawh dawn avangin, ram páwn lama hmunpui pan ve thei lote tan inentirna chhawp hnaihsak turin Guwahati-a damdawi-in hotute chu ngenin, thiamna bik nei doctor-te chu ni hnih/khat cháma Mizorama kal ṭhin turin a ngen a ni.

Health Minister chuan, Mizo damlo harsatna tâwk emaw, thihna emaw tâwk te, anmahnia sut tlang theih loh thil a lo awm ṭhin tih sawiin, chutiang thilah chuan awlsam zawka Mizote'n an buaipui theih nan Mizoram House thuneitu leh thawktute chu sorkar aiawh an nih avangin special entry card siamsak turin a ngen bawk.