MPYCC-in dâwta mipui bum tumah MNYF an puh

Congress party ṭhalaite chuan thuchhuah siamin, Bharat Hitraksha Abhiyan (BHA) mi leh sa 125 chuangin Bru raltlan, Tripura-a awm mekte tana phût neia Chief Minister's Office tuala an pung khawm (sit-in demonstration) thei chu mak an tih tàwp theih loh thu an tarlang a; MNF ṭhalaite chu BHA chêt danah dâwt thu phuahchawpa mipui bum tumah an puh.

Mizoram Pradesh Youth Congress Committee (MPYCC) chuan, BHA tih hming invuahte chu Hindu kulmûk pawl, Rashtriya Swayamsevak Sangh (RSS) volunteer (pra­charak) kum 22 chhung ni tawh kaihhruai a nih thu an tarlang a, "BHA mi 125 chuangin kan ram bu laizáwl luah a, Bru raltlan, Tripura-a mite thlavâng hauhna memorundum buaipui a, CMO tuala an rawn sapatâl kha mak kan ti tàwp thei lo a ni," an ti.

CMO tuala sit-in demonstration titute hi tute nge an nih a, an memorundum thehluh chu zir chian a ngaia a hriat vangin Congress ṭhalaite chuan September 13, 2019 khan Chief Minister hmuh an tum tih sawiin MPYCC chuan, "Beisei loh takin CMO gate chu paltlang rual lohin police vèntir tlat a ni," an ti a; ram leh hnam himna tura Mizote aiawha pên chhuak Congress ṭhalaite chu luhtir phal an ni lo tih an sawi.

MPYCC chuan, in hmun pakhat pawh nei lo Mizo chhungkaw tam tak an awm tih sawiin, "Chutih laia Bru raltlan Tripura a awm mek chhungkaw pakhat tan ram acre 5 (buh ṭin 5 hmun) ṭheuh pe a, chhungkaw 500 tana ram pe vek tura an nawrpui hian, MNF leh BJP-te hian BHA kaltlang hian ruahmanna an nei ta mai em ni tih hi kan rin rûk dan a ni," an ti.

BHA-te chu tun hmain Congress ṭhalai mai ni lo, Mizo mipuiin an la hre ngai lo a, CMO kawta an pung khawm chu an vawi khat hriatna a ni tih sawiin MPYCC chuan, "Chuti chunga Bru raltlan Hindu sakhaw betute tiduhdah a, dâwta Mizo Kristiante dik lo taka Prime Minister hnena hêkna Twitter account darh, MPYCC phuahchawp nia ngaia MNF ṭhalaite'n press release hmanga dâwt thu an zêldin hi a zahtheih loh thlak hle a ni," an ti a; tharum tel loa thil awmzia CM sawipui an tum lai a, tharum buaina chawh chhuah tum anga MNYF-in thu an thehdarh chu mak an tih thu an tarlang.

Congress ṭhalaite chuan, BHA-te Mizo­ram leh CMO-a an kal tur chu thup tlatah sorkar an puh a; thil awm dan leh nih dan zawng zawng Mizo mipui hmaa puang vat turin Mizoram sorkar an phût a ni.