CS-in HRVA leh DTM a tlangzarh

Mizoram Remote Sen­sing Application Centre (MIRSAC)-in 'Hazard Risk & Vulnerability Analysis of 8 District Headquarters' (HRVA) leh 'Digital 3-D Terrain Mapping & Modelling' (DTM) an buat­saih chu chief secretary Lal­nunmawia Chuaungo-in nimin khan Secre­tariat conference hall-ah a tlangzarh.

HRVA-ah hian Mizo­ram district headquarters hrang hranga khuarêl chhiatna thlen theihna hmunte remote sensing hmanga zir chianna te, chhiatna laka inven dan leh mipui a nghawng theih dante tarlan a ni a; DTM-ah chuan Mizoram leilung pian zia leh hmel­hmangte zir chianna tarlan a ni thung.

Tlangzarhna inkhawm hi Planning and Prog­ramme Implementation department secretary Dr C Vanlalramsanga'n a kaihruai a, sorkar department hrang hrang hotute an tel a ni. Chief Secretary chuan, tunlai thiamna hmanga Mizoram leilung zir chianna hlawhtling taka buatsaih a ni chu thil ṭangkai tak tur a nih thu sawiin, "DTM chu hmasawnna hna hrang hrang, a bikin inkalpawhna kawngpui siam nan leh ram pian zia mila hmalakna tur hrang hrang atan a ṭangkai dawn a, HRVA chu chhiatrupna laka invenna leh chhanchhuahna hna thawktu sorkar department hrang hrangte leh tlawmngai pawlte tan a pawimawh hle dawn a ni," a ti.

CS Lalnunmawia Chuaungo chuan, MIRSAC buatsaih heng HRVA leh DTM-te chu hmanraw ṭangkai tak a nih ang takin, ṭangkai taka hmang turin sorkar department hrang hrangte a chah a ni.