Lokayukta-in thubuai 2 a chingfel tawh Court-a thubuai thehluh a la nei lo

Mizoram Lokayukta chuan din a nih tirh aṭangin thubuai pahnih a chingfel tawh. Hetih lai hian, Lokayukta hian thubuai an chhuina report (chargesheet) Court-a thehluh an la nei lo thung.

Vanglaini palai zawhna chhangin Lokayukta chairman C Lalsawta chuan, thubuai pahnih an chinfel tawh thu a sawi. C Lal­sawta sawi danin, thubuai pakhat chu Anti Corruption Bureau (ACB)-in an chhui tawh, Lokayukta a awm hnua complaint lut ṭha leh a ni. ACB chu a hmaa an chhui dan zawhfiah a ni a, an thil chhui tawhnate zir chian a nih hnuah thubuai tihtawp a ni.

Thubuai pakhat chu Comptroller Auditor General (CAG) report hmanga complaint thehluh a ni. CAG report hi Assembly House property a ni a, a thlirtu tur chu Public Account Committee (PAC) an ni. Chuvangin, CAG report ringawt behchhana complaint lut chhui chu Lokayukta tih tur a nih loh theih avangin thubuai chu chhui zui a ni lo.

CAG emaw PAC-te'n Lokayukta-a complaint an thehlut a nih chuan thubuai chungchang chu chhui zui theih a ni a; complaint thehluttute pawh thil kalphung hrilhfiah an ni. Lokayukta Chairman chuan, Court-ah chargesheet thehluh an la neih loh thu a sawi a, "Complaint lo lut chhui zui ngai nia kan hriatte chu ACB hnenah chhui zui turin kan thawn a, an chhui chianna kan zir chian hnuah Court ngaihtuah tur emaw, thubuai tihtawp tur emawa thutlukna siam tur a ni. Mahse, ACB lam aṭangin chhui chiang tura kan tih an chhui chianna report kan la dawng lo," a ti.

March 11, 2019 khan C Lalsawta hi Mizoram Lokayukta chairman hmasa ber atan Governor Prof. Jagdish Mukhi chuan rinawmna thu tiamtirin a la lut a, chumi hnuah Lokayukta chuan a takin hna a thawk ṭan. Lokayukta-ah hian chairman bakah member pahnih awm tura ruahman a ni a, tun thlengin member ruat a la ni lo a, Chairman chiah a la awm a ni.