Dy.CM-in car parking sak mek a enfiah

Deputy chief minister Tawnluia chuan a department chan, Urban Development & Provery Alleviation (UDPA) hnuaia New Capital Complex chhunga Multi Level Car Parking sak mek chu a hmunah a enfiah a, hna thawktute nen hna thawh zel dan tur an sawiho.

Tawnluia chuan, New Capital Complex chu Mizoram sorkar hmunpui a nih avangin pisaa thawktu leh pisa dawrtu mihring an tam tih a sawi a, "Motor hûnna mumal leh remchang tak a awm tur hi a lawmawm a, he Multi Level Car Parking sakna tura sum mamawh Non-Lapsable Central Pool of Resources (NLCPR) aṭanga hmuh tur zat pawh tihfel vek a ni tawh," a ti.

Multi Level Car Parking sak nan hian cheng nuai 3,601 ruahman a ni a, November 20, 2017-ah bul ṭan niin, kumin November thlaah sak zawh tura ruahman a ni. Contractor chu Vikas & Associates an ni a, tun dinhmunah hna thawh tur zinga 60% vel zawh a ni tawh.

In sak zau zawng chu square metre 12,696 niin, floor (chhawng) kuaa sang a ni a, LMV 351 leh two wheeler 224 dah theih tura sak a ni. Chhâwng chung berah food court leh office a awm ang a, chhâwng (floor) dang zawng chu lirthei dahna tura ruahman a ni.