Aizawlah Florists' Fair 2019 buatsaih a ni

Mizoram Florists’ Association chuan nimin khan Aijal Club Park (City Park)-ah Florists' Fair 2019 an buatsaih ṭan a, Agriculture minister C Lalrinsanga'n a hawng. Minister chuan, pangpar chíngtute chu Mizoram tualṭo pangparte hlut turin a chah.

Minister C Lalrinsanga chuan, Florists’ Fair 2019 chu eizawnna atana pangpar khawi hmangte'n a hlâwk thei ang bera an hman theih nan tlawhtu leh leitu an ngah a ngai tih a sawi a; sorkarin pangpar chíngtute hamṭhatna tur a ngai pawimawh nia sawiin "Inphochhuahna ṭha zawk leh office an neih theih nan hmalak a ni," a ti.

C Lalrinsanga chuan, pangparte chu in leh a chhehvel chei mawitu a ni tih sawiin, "In leh lo chei mawina chauh ni lo a, mi tam takin eizawnna tak taka pangpar chîn an hmang chho hi ram inrêlbâwlna leh economy tan a ṭha a ni," a ti a; Mizoram pangpar (indigenous species)-te chu hlut leh zual tur te, hmun dangah leh ram páwnah pawh thawn chhuah theiha chíng uar tur te, ram páwn aṭanga lak luhin environment a nghawng theih avangin fimkhur turtein pangpar chíngtute a chah a ni.

Tun ṭuma Fair-ah hian mi 106-in an pangparte an pho chhuak a, pangpar chi hrang 60 chuang zawrh a ni a; September 20 thleng a awh ang. Pangpar pot-a khawi chi te, pangpar enkawl nana lei ṭha leh thlai ṭhantir thei (floweing hormones)-te pawh zawrh a ni a; inpho zinga upa ber chu C Thanzuali, Mission Venglai, kum 85 mi a ni. Mizoram Florists’ Association hi November 16, 1997-a din niin, member 1,000 chuang an awm mek.