Bru hruai kîr turin inpeih thawkhat Hruai kîrna tur sum dawn a la ni lo

Tripura refugee camp paruka Mizoram khua leh tui Bru-te Mizorama hruai kîr turin Mizoram sorkar chu a inpeih thawkhat tawh. Chutih laiin, Bru lak lêtna atan hian Mizoram sorkar chuan sorkar laipui aṭangin sum a la dawng lo.

Vanglaini palai zawhna chhangin Home secretary Lalbiakzama chuan, Bru hruai kir turin an inbuatsaih zo thawkhat tawh tih a sawi a, "Naktuk (vawiin) hian final meeting neih a ni ang. Ram leh hamṭhatna dang an dawn turah a tîra ruahmanna awm tawh sa bâk thil tihdanglam a awm lo," a ti.

Lalbiakzama chuan, sorkar laipuia Ministry of Home Affairs (MHA) aṭangin Bru lâk lêtna tur sum an la dawn loh thu sawiin, "Pawisa kan dawn dan azir zelin ruahmanna siam a ni dawn a, kan pawisa dawnin a daih tâwk angin ṭum khata hruai kîr zat tur bituk a ni ang," a ti a; sum dawn a nih hma chuan ṭum eng zat nge lâk lêt hna thawh theih a nih dawn sawi theih a nih loh thu a sawi.

Tarlan tawh angin, Tripura relief camp paruka Bru chhungkua 4,447-te hruai kîr hna chu October 1, 2019-ah ṭan turin Bru lâk lêt chungchang buaipuitu Joint Monitoring Group chuan tun hnai khan Delhi-ah an rêl a; Mizoram sorkarin Bru lâk lêt hna a thawhna senso atana a ruahman cheng vbc. 350 chuang pawh a thuphunga pawm a ni.

Bru hruai kîr hna hi ṭum riat thawh a lo ni tawh a, mahse, Mizorama kîr duh chu mi tlemtê chauh an la ni.