MHIP OB ni mekte báng turin an phût Inthlan thubuaiah chargesheet thehlut tawh

Kum 2019-2021 chhunga MHIP General Headquarters office bearer tur thlannaa ballot paper tihchingpena inpuhna thubuaiah police-te chuan Aizawl District Court-ah chargesheet an thehlut tawh. Ballot paper tihchingpen tuartutea inngaite chuan, ballot paper tichingpentute chu hrem ngei an phût thu leh tuna office bearer ni mekte chu criminal case nei an nih avangin bânna thehlut tura an phût thu an tarlang.

September 16, Thawhṭannia resolution an siamah hian, MHIP Gen.Hqrs. OB thlan tur thubuaia police-in chargesheet an thehluh tawha hming lang, tuna MHIP Gen.Hqrs. hruaitu ni mekte chu bânna thehlut ngei turin an phût tih tarlan a ni a; MHIP OB ni mek ṭhenkhatin criminal case an neih mek avangin, an thubuai chu chinfel a nih hma chuan MHIP Gen.Hqrs.-ah budget chhûng lut lo turin MHIP branch zawng zawng an chah bawk.

Police hotute hnen aṭanga thu dawn danin, MHIP Gen.Hqrs. inthlanna tura ballot paper tihchingpen thubuaiah hian Aizawla enfiah a nih hnuah, Guwahati-ah forensic expert-te finfiah turin thawn a ni a, chu mi result chu September thla tìr lam khan Mizoram police-te'n an dawng. Forensic laboratory-a enfiah a nih hnuah, ballot paper tihchingpennaa inhnamhnawihte hriat chhuah a ni.

Police-te chuan September 13, 2019 khan Court-ah chargesheet an thehlut a, chargesheet-ah chuan ballot paper tihchingpennaa inhnamhnawiha puh mi pali hming ziah lan a ni tih, thu dawnna chuan a sawi. Mi palite chu police-te'n chawlhkar hmasa tìr lam khan an ko tawh a; mi palite chuan anticipatory bail an la vek tawh nia thu dawn a ni. 

April 17, 2019-a MHIP Gen. Hqrs. OB thlanna neih turah secret ballot-te tihchingpen a awma hriat a nih avangin MHIP member pakhat Rohmingliani chuan District Court-ah FIR a thehlut a, chuvang chuan Court chuan inthlan hma ní April 16-ah MHIP inthlan tur chu a 'stay' (ṭhulhtir) a ni. June 2019 thla tîr lam khanah MHIP Gen.Hqrs. OB ding lai (2017-2019)-te chu District Court chuan a ṭhiat a; seal-te pawh Court-a thehlut turin a hriattir a ni.

MHIP Gen.Hqrs. chu Gauhati High Court-ah an zualko ve leh a, High Court chuan June 25, 2019-ah order chhuah­in, District Court-in MHIP Gen.Hqrs. chung­changa order a siam tawh chu a ṭhiat (suspend) a ni. High Court chuan June 28-ah thubuai a ngaihtuah leh a, August 31, 2019 ral hmaa MHIP Gen. Hqrs. OB thlanna buatsaih turin thu­tlukna a siam a; August 28 khan MHIP Gen.Hqrs. OB thlanna chu Vanapa Hall-ah buatsaih a ni ta a ni.

1.    Mizorama thil la thleng ngai lo MHIP Gen.Hqrs. OB inthlanna tura nomination paper MHIP Gen.Hqrs. office ngei aṭanga tihchingpen a ni hi zahthlak kan tiin, tun hnuah thleng tawh lo se kan ti.

2.    MHIP Gen.Hqrs. hruaitute venhimna hnuaiah leh ballot box chabi an kawl ngei chunga nomination paper khawih chingpen a ni hi an mawhphurhna hlen zo loah kan ngai, chuvangin, office luah zui tlakah kan ngai lo.

3.    MHIP inthlanna tura nomination paper 'rigging' hi ram danpui bawhchhiatna a ni. A titute hi danin an phû tâwk hremna pe ngei rawh se.

4.    Hetiang MHIP hruaitute berin criminal case an neih hi chinfel a nih hma chuan MHIP branch zawng zawngte'n budget hi chhûn luh ngamah kan ngai lo a, branch zawng zawngte budget chhûng lut rih lo turin kan inngenin kan in­hriattir e.

5.    Chargesheet-a hming lang, tuna hruaitu ni mekte hi bânna thehlut ngei turin kan phût tlat  a ni.