KHAWTHLIR

Aizawl District Disaster Management Autho­rity chuan vawiin hian chawhma dar 11 aṭanga tlai dar 3 inkarah Dur­tlang Leitan ko thenfai hna an thawk dawn a; hei vang hian hna thawh hun chhungin kawngpuiah tlân tlang theih a ni dawn lo tih Traffic SP Rodingliana Chawngthu chuan a puang.

Art Novelty chuan nimin khan Aizawlah art & craft exhibition 'Expression' an buatsaih ṭan a, adviser to chief minister C Lalramzauva’n a hmanpui. 'Expression' hian ni nga chhung a awh dawn a, lemziak hrang hrang 100 chuang pho lan a ni.

Electoral Verification Programme 2019 hmalakna kal mekah nimin khan Serchhip DC conference hall-ah Voter Awareness Forum (VAF) training buatsaih a ni a; Ser­chhipa Election officer Vanlalhmachhuana'n kaihruaiin, thil pawimawh hrang hrang inzirtir a ni.

Lalnunsiami (30,) Khawmawi chu September 16, Thawhṭanni chawhma dar 10 vel khan Mizoram leh Myanmar inrina Ṭiau luia Balukâi vela chêngkawl a khawrhnaah chesualin, tuiah a tla a, nimin zing dar 6 vel khan a ruang hmuh a ni. Lalnunsiami hi tuia a tlak hnuah Khawmawi, Zokhawthar, Hruaikàwn, Bulfekzawl leh a bul hnai khuaa ṭhalaite'n an zawng nghal a, nimin zing khan Bulfekzawl kàiah hmuh a ni.

Prime minister Narendra Modi pian champha pualin nimin zing khan BJP, Thenzawl Mandal-te chuan Thenzawla damdawi-in pahnih - Thenzawl Community Health Centre (CHC) leh Integrated AYUSH Hospital-ah damlo leh damlo awmpuitute leh thawktute tan ei leh in tur an buatsaih an sem.

Health minister Dr R Lalthangliana chuan tun hnaiah Kolkata, Guwahati leh Manipur-te a tlawh hnuah nimin khan Aizawlah a lo haw a, Lengpui Airport a thlenin Terminal MI room a enfiah. Minister chuan, inthiarna (toilet)-te chu Zoram hmel lanna pakhat a nih avangin mawihnai zawk, felfai leh thianghlim taka enkawl a ṭul thu leh hmalak nghal a ngaih thu a sawi.