MRFB-in kawng siam nan sum an ruahman

Mizoram Road Fund Board (MRFB) chu an chairman, chief minister Zoramthanga hoin September 16, Thawhṭanni khan Chief Minister’s Office conference hall-ah an ṭhukhawm a; sorkar kum kal mek 2019-20 chhunga kawng enkawlna tura sum hman dan tur an rél.

Chief Minister chuan, kawng a ṭhat chuan economy hmasawnna a chak phah avangin kawng ṭha neih a pawimawh thu leh kawng enkawl zuina lamah ṭan lak a ṭul thu a sawi, "Kawng thar siamna tur chu state sumin a tlin loh avangin páwn lam aṭangin sum mamawhte ngaih­tuah ṭhin a ni a, mahse, a enkawlna tur erawh state-in a intum tur a nih avangin ṭhahnem kan ngaih tlân a ṭul. Kawng siam leh enkawl hnate hi chhiah lâk khawm aṭanga thawh a nih avang­in fimkhur leh ṭhahnem­ngai taka hmalak zel ni se," a ti.

Sorkar thuchhuah tarlan dan­in, Mizoram Road Fund Rules 2017 tlawhchhanin Mizoram State Road Fund Board hi din a ni a, sum hnár hrang hrang aṭanga sum tlingkhawmte aṭangin Board kaltlangin PWD road division hrang hrangah kawngpui thawm ṭhat hna thawh ṭhin a ni.

Kum 2019-20 chhunga kawngpui thawm ṭhat nan cheng nuai 5,000 dah a ni a, chu'ng zinga cheng nuai 1138.28 chu Thawhṭannia Board meeting chuan normal maintenance work - kawngkhuar chhilh, leimin thenfai, kawng ko sâm fai, kawng bal leh culvert siamṭhat, etc. atana hman turin an dah.

Cheng nuai 3,722.44 chu kawng enkawl hna hautak zawk - resurfacing, strengthening, etc. atan dah an remti a; Pra­dhan Mantri Gram Sadak Yojana (PMGSY) kawng enkawl zui zelna atan cheng nuai 139.28 an dah bawk.

Mizoram Road Fund Board (MRFB) hi kum 2017 khan din a ni a, PWD changtu minister-in a kaihruai ṭhin. Board hnuaiah PWD secretary kaihhruai Executive Committee a awm. MRFB hmalakna zingah, state budget hnuaia sum hmuh hmanna tur te, kawngpui ṭha zawk a awm theih nana ruahmanna siam te, kawng chhia thawm ṭhatna tura hmalakna tur ngaihtuahte a tel.

September 16-a meeting-ah hian MRFB vice chairman leh chief secretary Lalnunmawia Chuaungo, member secretary (PWD secretary) JC Ramthanga, adviser to CM C Lalramzauva leh member dangte an tel a ni.