Thlêng siamna kháwl sem

Mizoram State Rural Livelihoods Mission (MzSRLM) hmalaknaa kuhva kau aṭanga thlêng (bowl/plate) siamna khâwl, arecanut plate making machine chu nimin khan Bilkhawthlir BNRGSK Hall kawtah Rural Development minister Lalruatkima'n a sem chhuak a, khawl phurtu motor-te a vai liam.

Lalruatkima chuan, self help group (SHG)-te'n kuhva kau/hnah aṭanga plate siamna kháwl an dawng tur chu a lawmpui thu sawiin, sik leh sá, leilungin a huat loh thlêng (eco friendly plate) siam chhuah nachang an hria chu fakawm a tih thu a sawi.

Pathianin ram leilung ṭha tak Mizote a pek chu hmang ṭangkai a, leilung theihnate hâi chhuah chu mihringte mawhphurhna a ni tih sawiin Lalruatkima chuan, MzSLRM kaltlanga sorkarin kut hnathawkte tana ruahmanna a siam chu dinchhuahpui tum ngei turin SHG member-te a chah. Thawhrimna, teirei peihna leh tumruhna nena hma la turin a fuih bawk.

MzSRLM hi kum 2013-ah kalpui ṭan niin, Mizoramah chuan Aizawl leh Lunglei district tel loin district dang parukah kalpui mek a ni.