MPF-in an thuchhuah zâwm turin ngen
Mizoram People Forum (MPF) chuan nimin khan Aizawl Press Club-ah thuthar thehdarhtute kâwmin, AMC inthlan tura an ngennate leh, MPF leh political party-te Thawhhona Thuthlungte an puangzar a; an ngenna leh thuchhuahte chu ngai pawimawha zâwm turin mi tin an ngen.
MPF president Rev. Dr C Lalhlira chuan, inthlanna zalên leh thianghlim a awm ngei theihna tura MPF-in ngenna leh thuchahte a sawi a, "Party tin leh worker te, candidate te, MPF duty-te leh mipuite kan thuchhuah ngai pawimawh a, zâwm ṭheuh turin MPF General Headquarters chuan a ngen tak meuh a ni," a ti.
MPF ngenna leh thuchhuahte
1. AMC inthlanah hian candidate pakhat tana sum sèn tur zat bithliah chu Rs. 1,00,000 a ni a, hei aia tam sèn loh ni se.
2. Sum leh therhlo dang hmanga vote lei leh hralh hi danin a phal loh avangin tih hauh loh tur a ni. Mimal leh páwl pawhin candidate-te hnenah thil phût neih tur a ni lo. Thil chi hrang hrang - lukhum, shawl, sanitizer, football, silpauline, jersey, etc. semte hi Election Model Code of Conduct-in a phal loh avangin tih loh tur a ni.
3. Candidate tan house to house campaign phal a ni a, mi pali thleng a hruai thei ang a, party member-te candidate tel loa campaign erawh phal a ni lo (Thawhhona Thuthlung).
4. Campaign-naah mimal inbeihna nei loin, policy leh manifesto hmanga campaign mai ni se.
5. Media hmanga inbeih leh insawichhiat hi tih loh ni se. Social media hmanga dik lo taka thu thehdarh hi danin a khap leh thehdarhtute na taka hrem theih a nih avangin tih hauh loh tur. Hetiang ti an awm chuan rang taka bawhzui nghal a ni ang a, a ṭul angin puanzar a nih bakah Election Commission-ah emaw, CID (Cyber Crime)-ah emaw hriattir zel a ni ang.
6. Zu leh ruihhlo hmanga vote zawn hi Election Commission phal loh a nih avangin tih loh tur a ni. Polling area bul hnaiah zu leh ruih theih thilin a tihbuai mekte awm phal a ni lo.
7. Vote neite'n zalên taka vote an thlak theih nan ṭan lâk ṭheuh tur a ni.
8. Dan angin tuma'n polling booth chhungah mobile phone ken luh loh tur. Hemi atana mawh phur tur hian MPF duty emaw, force mite emaw inruat ni se.
9. Covid-19 hri léng avangin physical distancing ngai pawimawhin, mask leh hand sanitizer hman ngaih pawimawh ṭheuh ni se.
10. Polling area leh a chhehvelah inthlan níin campaign loh ni se. Campaign hun a tàwp tawh bakah, vote thlak turte zalenna kan tibuai thei a, vote inleisakte a hrin theih avangin tih loh tur a ni.
11. MPF local forum leh constituency forum hminga duty-te'n party-te leh MPF Thawhhona Thuthlung hi party-te leh mipuite kan din tlànna a nih angin zâwma kengkawh tlat turin kan inchah e.
12. Model Code of Conduct bawhchhia leh kan Thuthlung bawhchhiate chu finfiah ngei a nih chuan MPF-in an bawhchhiatna constituency/ward chhung mai bakah, a ṭul angin puanzar a ni ang.
13. Kum upa zual leh rualbanlote intlartir reng lo a, vote an thlak thuai theih nan duty-te'n hma la se.
14. Vote nei zawng zawngin vote thlâk ṭheuh hi khua leh tui ṭhate tih tur a ni a, vote thlak ṭheuh turin kan insáwm a ni.