KHAWTHLIR

February 16, 2021-a Aizawl Municipal Corporation inthlan atana candidate tura hming pete inhnuhdawh theih hun chu nimin khan a tawp a, inhnûk­dâwk an awm lo. AMC inthlanah hian candidate mi 66 an awm a, chungte chu - Congress 19, MNF 19, ZPM 19 leh BJP pakua an ni. AMC-ah hian ward-19 awmin, paruk chu hmeichhe tana reserved a ni.

Zoram Medical College (ZMC)-a MBBS zir thar tur 2020 batch-te chu nimin khan ZMC Lecture Hall-ah Registrar & Dean hoin Orientation cum Foundation Basics neih ṭanpui a ni. ZMC-a MBBS 2020 batch zirlaite chu hostel-ah an lut kim tawh nia thu dawn a ni.

January 27, 2021-a Serluia tla Lianmawia (50), New Builum chu January 31, Pathianni khan a ruang hmuh a ni. Lianmawia hi Serlui kamah sangha mana riak ṭhin a ni a, January 27 tlaiah lawnga a chuang a chesual nia rin a ni. 

Mamit Bazar Veng chuan nimin khan Mamit Town Cleanliness Competition 2020-a veng fai inelnaa lawmman pakhatna an lâk lawmna an buatsaih a, district bawrhsap Dr Lalrozama'n a hmanpui. Hun hman zawhah bazar leh a chhehvel phiah fai hnatlang an nei nghal a ni.

State Referral Hospital-ah Covid-19 vei vangin nimin tlai dar 5 khan mi pariat enkawl mek an ni a, ICU-ah mi pakhat leh Isolation ward-ah mi pasarih an awm. ICU-a awm chu oxygen pek mek a ni a, Isolation ward-a awm zinga pakhat chu oxygen pek a ni bawk. ZMC-ah hian nimin khan mi 424-te swab sample endik a ni a, January 31 leh February 1-a lakte a ni.

Mamit District Coordination Committee on National Animal Disease Control Programme (NADCP) chu nimin khan an chairman Dr Lalrozama, district bawrhsap hoin an ṭhukhawm a; Avian Influenza (bird flu) laka invên dan tur an sawiho.