COVID-19: Mizoram dinhmun Chhuak tawh zat 99.11% a tling

January 31, Pathianni khan Mizoramah mi 475-te swab sample endik ni mah se, Covid-19 vei hmuh chhuah a ni lo. Nimin khan hripui laka fihlîm tawh mi pathum chhuahtir an ni a; nimin tlai dar 5 thleng khan hripui vei hmuh tawh mi 4,372 zinga mi 4,333 (99.11%) chhuahtir an ni tawh.

Pathianni khan ZMC laboratory-ah sample endik a ni lo a; TrueNAT-PCR hmangin Siahaah sample pakhat leh Rapid Antigen Test (RAT) hmang­in Aizawl, Siaha, Kola­sib leh Saitualah sample 474 endik a ni.

Nimina tlai dar 5 thlenga Covid-19 laka fihlîm tawh mi pathum chhuahtirte chu Aizawl district-a mi vek niin, Durtlang BSUP CCC aṭanga chhuak pahnih leh Zokhawsang CCC aṭanga chhuak mi pakhat an ni.

Mizorama Covid-19 vei hmuh chhuah tawh chu mi 4,372 an ni a, mipa 3,198 leh hmeichhia 1,174 an ni. Nimin tlai dar 5 thleng khan mi 4,333 (99.11%) chhuahtir an ni tawh a, mi pakua (0.21%) thi tawhin, enkawl mek mi 30 (0.68%) an awm.

January 31, 2021 thlenga Mizorama swab sample endik tawh zat chu 2,07,659 a ni a, chu'ng aṭanga Covid-19 positive mi 4,372 chu 2.11% a ni. Hripui vei hmuh tawh zinga mi 2,069 chu Mizoram chhunga kái an ni a, mi 2,303 chu Mizoram páwn aṭanga an rawn luh hnua hmuh chhuah an ni thung.