Kolasib DC leh Cachar DC an inkâwm

Kolasib DC leh Cachar DC-te chu nimin khan Kolasib-ah an inkâwm a, an district ve vea sorkar official dangte'n an ṭawiawm. State/district pahnih ramri chungchang leh boruak muanawm a awm zel theih dan turte sawiho a ni.

Cachar DC Keerthi Jalli chuan, ramria boruak rálmuang siamna kawnga Kolasib DC hmalakna lawmawm a tih thu sawiin, "Inthlanna thianghlim leh felfai Assam-a a awm theih nan dan phal loh bungrua, ruih theih thil leh pawisa tawlh luh vên a ṭul," a ti a, chumi kawngah chuan Kolasib DC nen thawhhona ṭha neih a pawimawh thu a sawi.

Assam Assembly inthlanpui neih tura inpuahchahna kawngah lirthei indaih lohna a nasat avangin lirthei ruahmansak theih ni se a duh thu Cachar DC chuan a sawi bawk.

Kolasib DC Dr H Lalthlangliana chuan, thawhhona ṭha nei tur chuan indàwr tawnna langtlang tak neih a ṭul thu leh, state ramria boruak muanawm siam kawngah theihtawp a chhuah tur thu a sawi.

State pahnih DC-te inkawmnaah hian district pahniha SP, additional DC, additional SP, assistant commissio­ner, DTO, IPRO leh official dangte an tel a ni.