Sorkar sum dinhmunin a sen a kâwk; PMGSY-ah cheng vbc. 391.39 a bo - MPCC

Mizoram Pradesh Congress Committee (MPCC) Media depart­ment chuan nimin khan Congress Bhavan-ah thuthar thehdarhtute an kâwm a; Mizoram sum leh pai dinhmunin a sen a kâwk niin an sawi a, "PMGSY hnuaiah cheng vbc. 391.39 a bo," an ti.

MPCC Media chairman Dr Lallianchhunga chuan, Lal Than­hawla kaihhruai Congress sorkar kha sum leh pái enkawl kawngah a fimkhur a, a che ṭha hle nia sawiin, "RBI aṭanga a ṭulna apianga sum pûk theihna (ways and means advances) hmangin June 30, 2016-ah sum a pûk a, a bak a pûk nawn lo. Sum leh pai dinhmun a ṭha chho zel a ni," a ti a; kum 2018 inthlana an tlakin sorkarna siamtu MNF chu cheng vbc. 500 chuang an hnutchhiah thei tih a sawi.

RTI Act hmanga an zawhna chhànna aṭangin MNF sorkarin sum harsatna an tâwk nasaa a lan thu sawiin Lallianchhunga chuan, "Kum 2019-20 leh 2020-21 chhungin ways and means advances aṭangin RBI-ah ṭum 31 sum an pûk tawh a, an pûk belhkhawm chu cheng vbc. 512.90 a ni. A pung tam zawk special drawing facility hmangin vawi 15, a vaiin cheng vbc. 218.18 an pûk tawh bawk," a ti.

Dr Lallianchhunga chuan, Cong­ress sorkar tàwp lamah Mizo­ram sorkarin RBI-a a sum neih zat chu cheng vbc. 400 a tlin ṭêp ṭhin thu sawiin, "MNF sorkarin sorkar hnathawkte December 2020 hlawh a pek lai January 6, 2021 khan RBI-ah Mizoram sorkarin sum dah a nei lo. Engtin tin emaw January 13, 2021-ah vbc. 73.60 a tling ve a, hlawh an pek leh chuan a zo leh vekin a rinawm," a ti a; MNF sorkarah leibá a pung chak hle niin a sawi. 

MPCC Media Chairman sawi danin, MNF sorkar kum hnih chhungin sorkar leibá cheng vbc. 1,000 velin a pung. Mizoram sorkar leibá chu kum 2019-20 ah vbc. 7,771.08 leh kum 2020-21 ah vbc. 8,701.26 a ni. Minister of state Robert Romawia Royte hoa lungphûmte chu budget head-ah a lan loh chuan state sorkar leibá a pung hle turah an ngai.

Zawhna chhangin Dr Lallianchhunga chuan, Covid-19 sum leh pai dinhmunin a tawrh dan chu nakkumah a hriat dawn chauh niin a sawi a, "Tuna kan sum dinhmun chhiat chhan hi chu inthlahdah taka sum an hman vang leh enkawl thiam loh vang a ni. Mizoram sorkar kan hrawn mek hi sum leh pái dinhmunah hetiang a nih tâkah chuan Mizoram hmasawnna a tak taka hmuh tur a awm theiin a rinawm lo. Sorkar hnathawk hlawh pawh a rualin an pe thei lo a ni," a ti.

MPCC Media hotute chuan, kawngpui laihna scheme PMGSY-ah harsatna nasa tak a thleng mek nia sawiin, "Contractor-te'n October 2020 aṭangin bill an la thei lo. PMGSY sum hi 60% hman zawh a nih veleh central sorkarin 40% dang a release chauh ṭhin," an ti a; Mizoram sorkarin 60% hmanna a chinfel theih loh avangin central sorkarin 40% an pe chhuak thei lo niin an sawi.

Kum 2019-20 atana sanction cheng vbc. 640 chu Mizoram sorkarin a dawng vek tawh nia sawiin MPCC Media chuan, "March 31, 2020 thleng khan Finance department-in PMGSY enkawltu agency MiRRDA account-ah cheng vbc. 248.69 chiah an chhûng lut. A dang vbc. 391.39 chu hupbeh a nih avang leh a awmna chin hriat a nih loh avangin contractor-te'n bill an la thei lo. PMGSY sum bo hi eng atana hman nge tih kan zawt a ni," an ti.