MNF hotute AMC inthlan atan an campaign MNF President-in AMC-ah an chak a ring

MNF president Zoramthanga chuan nimin khan Chanmari YMA Hall-ah AMC Ward-V Campaign hawnna inkhawm a hmanpui a; MNF chu Pathianin tun hun atana a chhawp chhuah mek a nih avangin AMC-ah pawh MNF an tlin ngei a rin thu a sawi.

Zoramthanga chuan, India leh Mizoram politics thlirin harh a hun tawh thu leh a thli tleh dan leh boruak enin a chiang niin a sawi a "Party pathum en ila, MNF hi Pathianin tun hun atana a chhawp chhuah mek a ni. Party dang candidate fel leh ṭha tak tak an awm ang, mahse, Pathianin Zoram tan hunbi a siamah MNF hun a thleng mek a, AMC-ah pawh kan tlin leh ngei ka ring," a ti.

Congress party chungchangah Zoramthanga chuan, Delhi-ah an tla a, India ram hmun hrang hrangah an chhe deuh vek tawh nia sawiin, "Duh duh tiin kum 50 chhung India ramah ro an rél tawh a, Mizoram ngei pawh President's Rule-ah an dah a, an duh duhin an tâl a, an thil tihin a vaw let a ni," a ti a; Congress chu sorkar leh turin a thlíin a beng tawh lo hrim hrim niin a sawi. 

MNF President chuan, ZPM hotute thangkamah Lalduhoma chu a âwk nia sawiin, "Ama dan siam ngei a bawhchhia a, Speaker hmaah a ding ta a ni," a ti a; ZNP tam takin ZPM vote an tum lo nia sawiin, "A ni tèlin an tê tulh tulh mai a ni," a ti.

Inkhawmah hian minister of state leh MNF adviser K Lalrinliana, Aizawl North-III bialtu MLA C Lalmuanpuia, Lawngtlai East bialtu MLA H Biakzauva leh AMC Ward-V MNF candidate Rochhunga Ralte te pawhin thu an sawi a ni.

MNF senior vice president Tawnluia pawhin nimin khan Bethlehem Veng YMA Hall-ah AMC Ward-XVI Campaign hawnna inkhawm a hmanpui a, ward manifesto a tlangzarh.

Tawnluia chuan, AMC-ah Aizawl South-I biala AMC ward pahnihah MNF-in councillor an la nei ngai lo tih sawiin, "Kan la tling ngai miah lo hi, titling tawh tura lokal ka ni a, kan tling ngei ngei tawh tur a ni," a ti.

UDPA minister ni bawk Tawnluia chuan, AMC chu UDPA enkawl a nih angin, an inthlang thei tur chu an lawm thu sawiin, "Tun ṭuma inthlan tur hi inthlan laiin AMC-ah sorkar bik awmtir loin, fair takin kan inthlang dawn a, chutiang tur chuan CM hoin kan duang a ni," a ti a; kum 2015-2020 chhunga AMC-a MNF councillor-te hnathawh a tam thu a sawi.

AMC tihphuisui zel a, hna thawk thei tak tak turin siam an tum tih sawiin Tawnluia chuan, "AMC-ah post ruak 98 siam mai tura kan tih chu Covid vangin kan ti thei mai lo a, Pathian zarah sorkarna kan siam chuan kan hnawhkhat ang. Municipal Services kan siam ang a, kum nga chhung khan hna thawk eng emaw zat kan dah nghet. Solar street light 6,000 siam mekin, a chanve vel kan siam zo tawh a, in sak permit 980 kan pe a ni," a ti.