Kum kal mekah Property Tax hmu ṭha

Aizawl Municipal Corporation (AMC) chuan sorkar kum kal mek, 2020-2021 chhungin Property Tax Rs. 3,02,58,886 an hmu tawh a, kum a tàwp hmain kum hmasa 2019-20 chhunga an hmuh Rs. 2,98,94,000 chu Rs. 3,64,886-in an khûm tawh.

AMC hotute chuan, kum kal mekah January thla tàwp thlenga Property Tax lut Rs. 3,02,58,886 a tling thei chu local council-te thawh raha an ngaih thu an sawi a, "LC-te kutah kan innghat tawp a ni ber a, min khawnsak a, an ṭang hle; hei hi Property Tax luh ṭhat chhan a ni," an ti.

Kum tin in sak belh an awm a, chu'ngah chuan LC-te'n Property Tax an khawm zung zung avang te, kum hmasaa chhiah pe lote'n an pek leh hlawm avangtein kuminah chhiah lut a tam phaha an hriat thu an sawi bawk.

Property Tax aṭanga sum lut zinga 5% chu a khawntu LC hnenah pek a ni a, 80% chu AMC ward 19-a hmasawnna hna thawhna atan dah niin, bialtu councillor hnenah hlan a ni. A bâk 15% chu inenkawlna (administration cost) atan hman a ni thung.

Property Tax hi AMC chhungah kum 2015-16 aṭangin khawn a ni a, hmasawnna hna thawhna atan kum 2017-18 aṭangin councillor-te hnenah pek chhuah ṭan niin, pek chhuah ṭan kumah hian Rs. 9,00,000 ṭheuh pek a ni.

Kum 2018-19 leh kum 2019-20 chhung khan councillor-te hnenah Rs. 10,00,000 ve ve ṭheuh pek a ni a, sorkar kum kal lai 2020-21 ah Rs. 12,20,000 ṭheuh pek a ni bawk.

AMC ward tinah Property Tax return Rs. 41,20,000 ṭheuh pek chhuah a ni tawh a; kum li chhungin ward 19 atan Rs. 7,82,80,000 pek chhuah a ni tawh.