Lawngtlaiah nungcha humhalh dan tur rêl

Lawngtlai District Wildlife Crime Control Sub-Unit chu nimin khan SP conference hall-ah an chairman DKS Singh, Lawngtlai SP ho in an ṭhukhawm a, tlawmngai pawl hrang hrangte nen sava veh, sa pêl leh ramsaa sumdawnna titawp tura hmalak dan tur an sawiho.

DKS Singh chuan, thing leh nungchate humhalh chu mihringte tih tur a nih thu sawiin, "Sakhaw hrang hrang zirtirna nen pawh kal kawp tlat a ni a, dan loa ramngaw leh nungcha tichereutute chu na taka hrem theih an ni," a ti. Phai lam nena khaikhinin Mizoramah khaw chhung leh kawngpui dunga nungcha leh sava hmel hmuh tur a váng lutuk chu inenfiah nan hman a ṭul thu a sawi bawk.

Chhimtuipui Wildlife Division-a DCF Samson Thanruma tarlan danin, sorkar kum kal mekah Lawngtlai district-ah wildlife kaihhnawiha dan bawhchhiatna ṭum sarih a awm a, court-a thubuai kal mek pahnih a awm.

Ṭhutkhawmah Central YLA, Lawngtlai district MJA, Phawngpui Photographers' Association leh tlawmngai pawl dangte an tel a; airgun hmanga sava veh tihreh dan tur leh sapêl leh a kaihhnawih dan bawhchhiatna man kawnga thawhho dan tur an rêl. Kohhran leh media kaltlanga inzirtirna tam zawk buatsaih tur leh dan bawhchhiate zing zawka vâi dan turte an

rél bawk.