January 2021-ah rakzu ltrs. 4,394 man

Excise & Narcotics department (END) chuan kumin January thla chhung khan rakzu litre 4,394, Methamphetamine (meth) kg. 6.931 leh ruihhlo dang eng emaw zat an man a; ruihhlo an man kaihhnawihah mi 248 an man bawk.

END leh ruihhlo dona kawnga an thawhpuite chuan January 30, Inrinni khan hmun pathumah heroin gram 378 an man a; ruihhlo kaihhnawiha mi an mante lakah The Narcotic Drugs & Psychotropic Substances Act, 1985 tlawhchhanin thubuai an ziak lut a, Special Court (NDPS Act)-a an hruai hnuah Court thu angin Central Jail-ah dah luh an ni.

END hnuaia Anti-Narcotic Squad chuan January 30 chawhnu dar 2:30 khan Zemabawk Berawluiah heroin gram 129 (hawng 8) leh a neitua puh mi pahnih - Laihnuni (40) d/o Lalthanzama leh Zokhuma (59) s/o Dotuliana, Ruantlang, Champhai district nia inchhálte an man.

January 30 zan dar 8:30-ah Assam Rifles leh Bethlehem Veng Branch YMA-te nen ṭanghoin Bethlehem Vengah heroin gram 189 (hawng 14 leh bûr/caine 40) leh a neitua puh mi pathum - Zonunsiami (45) d/o Liandawla, Hualtu, Lalchhuanzela (32) s/o Sapchhuana, Saikhumphai leh Lalengmawii (27) s/o Lalnoliana, Bethlehem Venga khawsa mek ve ve nia inchhálte an man leh a ni.

Inrinni zan vêk, dar 11:30-ah END chuan Luangmual Branch YMA, Zotlang Branch YMA leh 46th Assam Rifles-te nen ṭanghoin Luangmualah heroin gram 60 (hawng 4 leh bur/caine22) leh a neitua puh mi pathum - Lalrinsangzuali (36) d/o Liandawla, Rangvamual Mel-3 (Zotlanga khawsa mek), Mona Masik (41) d/o YF Masik leh Lalzidinga (38) s/o Lalfakzuala (L), Dawrpui West-a khawsa mek nia inchhálte an man bawk.

END chuan ruihhlo man kawnga an thawhpui tlawmngai pawlte leh 46th Assam Rifles-te chungah an lawm hle tih an tarlang.