Bru-te Mizorama lêt ngei turin Joint NGO-te'n an ngen

Joint NGO Coordination Committee hruaitute, nimina Central YMA pisa-a ṭhukhawm chuan, Tripura relief camp-a Bru, Mizoram khua leh tui dik tak tih finfiahte chu Mizorama lêt ngei turin an ngen a; tun ṭum bak chu Bru hruai kîr hna thawh a rem tawh dawn lo tih an tarlang.

Meeting kaihruaitu Central YMA president Vanlalruata chuan, tun hnaia Bru-te thil ngensaktu Bharat Hitaraksha Abhiyan (BHA)-te chu an lo kal dawn tih thâwm an hriat thu sawiin, "Tiang taka an lo kal kha kan ring lo. A hmain Tuikukte'n Chief Minister leh Home Minister hnenah an eizawnna tur ram pe turin an ngen a, keini'n ngaihtuah lo tura ngenna kan thawn. Chutiang chiah chuan BHA-te thu thlen pawh ngaihtuah a ngai lo," a ti.

Bru-te chungchang ngaih­tuahtu tur Joint Monitoring Committee (JMC) a awm tih sawiin Vanlalruata chuan, "Chief Minister leh Home Minister hnenah pawh Bru chungchang chu JMC ngaihtuah tur a nih thu kan thlen a ni," a ti a; Bru lo kirte'n chhawmdawlna an dawn tur aia ṭha chu tun ang laiah a awm theih loh thu a sawi.

CYMA President chuan, kumina Lok Sabha MP inthlan dáwnah Bru chungchang vangin NGO-te'n inthlan boycott an tum thu sawiin, "Sorkar nen inbe rawh u, min tih angin kan inbia a, Tuikuk lâk lêt hna tun ṭuma neih tur hi a tàwpna tak tak a nih tur thu an sawi avangin kan boycott ta lo a ni. Inremna kan nei a, inremnaah Chief Secretary-in hming a ziak thlap a ni," a ti.

Vanlalruata chuan, an agenda-ah MLA Dr BD Chakma chungchang a tel thu sawiin, "Sorkar hmasa khan Dr BD Chakma hi NGO-te nawrna avangin minister aṭanga chawlhtir a ni. Tunah hian minister-a dah tumna thâwm a awm a, thu tak a ni nge ni lo phei chu kan hre lo," a ti a; Dr BD Chakma chungchangah NGO-te chuan dinna nghet tak an neih tawh thu a sawi.

CYMA general secretary Lal­hmachhuana chuan, Bru-te chuan an lo neih tur kumkhuaa an nei tura pek an phût tih sawiin, "State páwn aṭang pawhin an rawn ngenpui a, CMO tual hial an thleng thei tih kan hria. Mizote pawh harsa tak tak tam tak an awm a, Tuikukte'n hamṭhatna ṭha tak an dawng dawn chunga harsatna an siam lui ṭhin hi rilru a na ve ṭhin," a ti.

•    October 2019 aṭanga Tripura camp-a Tuikuk awmte, a ṭum kuana atana lak let hna ṭan turah Mizoram aṭanga chhuakte leh an thlah kal zelte chauh lak let an nih theih nan fimkhur taka hma la turin sorkar kan beisei. Ruahmanna awm sa ang ngei hian, Tuikuk lak let hna hi tluang taka a kal theih nan hma la turin thuneitute kan ngen a ni. Tripura camp-a awm Tuikuk, Mizorama let thei tura sorkarin identification a tihfel tawhte pawh a bo a bâng awm loa Mizorama lêt ngei turin Joint NGO chuan a ngenin a beisei.

•    Tun ṭuma lak lêt hna thawh bak hi chu Mizoram sokar pawhin kalpui tawh lo turin Chief Secretary hming sign hnan meuh a, ziaka a lo intiam tawh angin (Vide No. J. 11029/1/2019-HM(Bru) Dated 3rd April, 2019) hun hawn leh a remchang tawh dawn lo a, Mizoram mipui pawhin an pawm thei tawh dawn lo a ni tih kan inhriattir a ni. Hun ṭha a inhawn laia ṭhahnemngai taka lo lêt ngei turin kan ngen a, Mizoram sorkar pawhin Tuikuk lak letna tura sum a dawn tawhte pawh, a nihna ang taka hman a nih theih nan ruahmanna chak taka kalpui turin Mizoram sorkar pawh kan beisei a ni.

•    Myanmar ram aṭanga dan loa Mizorama lo lût Rakhine hnam nia rin hriat theih chinah mi 489 lai khaw pali - Dungzautlang, Zochachhuah, Kakichhuah leh Hmawngbuchhuah aṭanga Mizoram electoral roll-a thun a ni hi hriatthiam har kan ti a, ṭha kan ti lo. He thil hi ngun taka zir chiang a, Mizoram electoral roll aṭanga paih an nih ngei theih nan thuneitute hma la nghal turin kan ngen. Paih an nih ngei theih nan hian NGO Coordination hian hmalak a tum bawk a ni.