Court-a thu a kal mek laia thu belhchian dâwl lo thehdarh pawi kan ti - MHIP Gen.Hqrs.

MHIP General Headquarters chuan nimin khan thuchhuah siamin, MHIP Gen.Hqrs. office bearer thlan dawna ballot box tihchingpen thubuai chu Court-in a chingfel mai turah an ngai a, Court-a thu a kal mek laia thu belhchian dâwl lo thehdarh a awm chu pawi an tih thu an tarlang.

MHIP chuan, harsatna tam tak an tawh mek laiin thu chiang lo leh finfiah tur awm lo, thu lêng vel tam tak a awm chu pawi an tih thu tarlangin, "MHIP Gen.Hqrs. hruaitute'n harsatna leh mualphona an tawh ngei theih nana mipui hnenah pholan a ni fo hi tlawmngai pawl tan chuan thil tih loh tawp tur a ni. MHIP Gen.Hqrs. hruaitute Court-ah khin an ni hi kan dan bu kalh tlat a ni," an ti. 

Hruaitu thlan dawna ballot box tihchingpen chungchangah MHIP thuchhuah chuan, "Court-kutah kan dah a, Court-in a chingfel mai turah kan ngai. Court thu kal lai a nih avangin thu belhchian dâwl lo leh famkim lo thehdarh hi a pawi kan tiin kan ngai thu tak hle a ni," a ti a; Court judgement a chhuah hunah thu dik a lang mai turah an ngai tih a tarlang.

Thuchhuah chuan, MHIP Gen.Hqrs. OB-te'n criminal case an awrhna/inpuhna chungchangah tun thlengin Court lehkha an la hmu lo tih tarlangin, "Police investigation kal lai hi confidential matter a ni ṭhin a, lo hre lâwk zel anga insawi an awm hi thu belhchian dâwl nge ni a, a leak out ve hrim hrim tih hi kan hriatthiam phak a ni ta lo," an ti a; chargesheet-a hming langte an hre thei chu mak an tih thu an sawi.

MHIP chuan, páwn lam aṭanga thu­chhuah siama MHIP Gen.Hqrs. kalphung pangngai tihbuai tum an awm tih sawiin, "Branch tinte budget pe lo tura an tite hi an tih loh tawp turah kan ngai. Budget chung­chang hi April 2019-a Assembly rorel palaite'n kan pass vek tawh a nih avangin, Assembly thurel kalh zawnga inrawlh an awm hi a thiang loah kan ngai," an ti.

MHIP Gen.Hqrs. chuan, thu léng vel avanga chî-âi lo tur leh an kalphung pangngai anga kal zel turin MHIP branch tin an chah a; Pathian hruainain kum 2019-2021 atana MHIP Gen.Hqrs. hruaitu thlan tharte chu rinawm taka an thawhho zel dawn thu an sawi bawk.