MADC leh CADC-ah dan palzûtna leh Thil dik lo tih a tam hle - R Lalzirliana

Mara Autonomous District Council (MADC) leh Chakma Autonomous District Council (CADC) sorkar hnathawh dan chhui tura ruat inquiry commission chuan an report sorkarah an thehlut tawh. District Council & Minority Affairs (DCMA) minister R Lalzirliana chuan, MADC leh CADC sorkarin thil dik lo an tih nasat thu a sawi.

Vanglaini palai zawhna chhangin DCMA Minister chuan, MADC leh CADC sorkar thil tih danah report a awm avangin Mizoram sorkarin chhui chiang tur inquiry committee a din thu a sawi a, "MADC chu Siaha DC-in a chhui a, CADC chu Lawngtlai DC-in a chhui. DC pahnih hian an thil chhuia an hmuh chhuahte sorkarah an thehlut tawh," a ti.

R Lalzirliana chuan, inquiry commission report chu Governor-ah an la thehluh loh thu sawiin, "Report aṭanga a lan dan chuan, ADC pahnih sorkarah hian dan palzûtna leh thil tih dik loh a tam hle. Keini tan report-a tarlan loh thup ṭhen theih a ni lo a, thil dik lo an hmuh chhuahte Larsap hnenah kan thehlut ang," a ti a; thutlukna siamtu tur chu Governor a nih thu a sawi.

Inquiry commission-in an chhui chian chu MADC-ah chuan Congress-in sorkarna an siam laia mi a ni a, CADC-ah chuan Congress leh BJP-in sorkarna inṭâwm an siam hun laia a mi a ni thung. Tunah chuan CADC-ah hian Congress MDC palite'n MNF an thláwp tawh avangin MNF-in MDC an ngah ber a; MADC-ah chuan Congress Legislature Party-a elected member 17 leh nominated member pathumte'n BJP Legislature Party an zawm tawh a ni.