CKṬP-in an member zirlai harsa Chhawmdawlna tur a ruahman

Central Kristian Ṭhalai Pawl (CKṬP) chuan KṬP member zirlai thiam thei, chhungkaw khawsak harsa site puiha chhawmdawlna tur a ruahman thar a; kum khatah zirlai harsa, zirna lama beiseiawm mi panga aia tam lo hnenah chhawmdawlna hi pek theih tura ruahman a ni.

Hemi chungchanga Vanglaini palai zawhna chhangin Central KṬP general secretary Rochungnunga chuan, "KṬP member, zirlai lehkhathiam thei, sum lama harsa si mi panga thleng ṭanpui theihna turin ruahmanna siam a ni a, mi pakhat hnenah Rs. 20,000 zela pek tur a ni. KṬP branch aṭangin Bial KṬP kaltlangin CKṬP-ah dil tura ruahman a ni a, mimalin a dil duh a nih pawhin, a awmna branch committee-ah dilna a thlen thei ang," a ti.

CKṬP General Secretary sawi danin, kumina KṬP Rorel Inkhawmah Synod Hospital-a HIV/AIDS veite enkawlna Grace Home ṭanpuina tura rawtna lut kal zelah, KṬP-te'n kum tina chhawmdawlna puala zan khat inkhawm thawhlawm an lâk khawm ṭhin hman dan tur en ṭhat a ni a; CKṬP-in ruahmanna thar siamin, zirlai harsa, lehkha zir zelna lama beiseiawm site ṭanpui theihna turin chhawmdawlna pual sum hman dan tur a siam ta a ni.

KṬP chhawmdawlna hi kum khatah (calendar year) mi pangain Rs, 20,000 zel an hmu thei dawn a, kum tin dil tur a ni. Form awm sa hmangin KṬP branch-in an member, chhawmdawlna dilsak tur an neih chuan an dilpui ang a, dilna chu Bial KṬP-ah thlen phawtin, Bial KṬP-in CKṬP-ah a thlen leh chhâwng dawn a ni. KṬP member, ṭanpuina mamawhin a dil duh a nih chuan lehkhapuanah ziakin a awmna KṬP branch-ah a thlen hmasa phawt thei bawk ang.