KHAWTHLIR

Lok Sabha MP C Lalrosanga chuan September 17, Thawhlehni khan Zokhawsang hmuna Assam Rifles hmun thar buatsaih mek a tlawh a, hmalakna kal mekte a enfiah. Hmunhma khawihtu contractor-te chuan, AR sipaite chenna tur hmunhma leh inte chu November 2019 chhungin luah theiha peih hman an rin thu an sawi a; MP pawhin, a theih anga chak leh ṭhaa hna thawk turin a hrilh a ni. C Lalrosanga chuan Thawhlehni vêk khan Mizoram chhung ramri depa kawng siamtu Border Roads Organisation (BRO) Project Pushpak hmunpui, Ṭhuampui, Aizawla mi a tlawh bawk.

Aizawl Civil Hospital-ah August 2019 chhung khan inentir Out Patient Department (OPD)-ah mi 35,384 leh Casualty-ah mi 4,159 an awm a; mi 1,117 admit an ni a, nau piang 389 (dama piang 385 leh thia piang pali) an awm laiin, mitthi 55 an awm. Phaia inenkawl tura tih mi 225, zai tawk mi 1,151, laboratory-a en 93,694, x-ray-a en 2,360, endoscopy-a en 405, ultrasound-a en 564, ECG-a en 950, echo mi 165, CT scan-a en leh dialysis tihsak mi 322 an awm bawk.

Tipa (Tuipang) RD Block chhunga Jal Shakti Abhiyan (JSA) kalpuinaa hmalakna hrang hrang - tuikhur chei ṭhat, tui lakna, thing phunte leh hna thawh dangte chu September 17, Thawhlehni khan sorkar laipui aiawhin Central Prabhari officer for JSA Sanglur, Ministry of Chemical and Fertilizer-a economic adviser Dr Manik Chandra Pandit, National Institute of Hydrology-a scientist-E Dr Sanjay Kumar ten an enfiah. Hei hi Central team-in Tipa block ṭum thum an tlawhna a ni a, Tipa BDO James Lalnithanga leh  thawktu dangte'n an ṭawiawm a ni.

Serchhip District Level Standing Committee on Special Summary Revision of Electoral RoIl, 2019 chu an chairman Sangchhin Chinzah, district election officer hoin nimin khan a pisaah an ṭhu. Electoral roll ennawnna kal mekah polling station thar siam dilna leh a hmun (in) thlak dilnate an pawmpui. Thenzawlah polling station paruk awm ṭhin chu 10-ah an tipung a; New Serchhip-III, Buangpui, Thinglian, Hriangtlang, Biate PS I&II leh Piler PS-te chu sawn a ni. Baktawng-II & III-te chu Chhuanthar Tlangnuam I & II tia thlak a ni bawk.