Zemabawk Health & Wellness Centre hawng Tuna Mizoram IMR chu 15 a ni - Health Minister

Zemabawk Urban Primary Health Centre (UPHC) chu Health & Wellness Centre-ah siam a ni a, a hmun (building) tharte nen nimin khan Health & Family Welfare mi­nister Dr R Lalthangliana'n a hawng. Mi­nister chuan, tun dinhmunah Mizorama infant mortality rate (IMR) chu 15 a nih thu a sawi.

Dr R Lalthangliana chuan, Zemabawk Local Council-in UPHC awmna tur ram an thawh chu a entawn tlak a tih thu sawiin, "LC leh tlawmngai pawl hrang hrang leh mipui ṭan rual vanga tun dinhmun thleng thei a ni," a ti. Mizorama primary health centre leh sub-centre-te thuam tharin, Health and Wellness Centre-a leh vek tura hmalak a nih thu sawiin, "Sorkarin theihtawp chhuahin a taka tihhlawhtlin a tum mek a, kum 2022 thlengin hei hi kan tihhlawhtlin a beiseiawm," a ti.

R Lalthangliana chuan, Zemabawka cancer inenkawlna tur cancer specialty centre leh damdawi-in cheng vbc. 500 senna tur JICA sum hmanga din tum mek a nih thu leh, cheng vbc. 480 hmangin RIPANS tihchangtlunna sorkar laipuiin a ruahman fel tawh thu a sawi.

Health Minister sawi danin, hriselna lamah Mizoramin hma a sawn a; kum 2010 SRS survey report-a nausen thi zat tehnaah Mizorama infant mortality rate (IMR) chu 37 (nausen 1,000 zelah 37 an thi tihna) a nih laiin, SRS Bulletin thar ber May 2019-ah chuan Mizoram IMR chu 22 a ni  a, tunah chuan 15 a ni tawh. NITI Aayog-in June 2019-a Health Index Card an tihchhuahah chuan state tênau zingah Mizoram chuan point 74.97 hmuin, a ti ṭha ber a ni.

Dr R Lalthangliana chuan, hriselna kawnga Mizoram hmasawnnate chu chhuanawm a tih thu a sawi rualin, "Hei hi duh tâwk mai loin, hriselna hmalakna tehkhâwng hrang hrangah target kan set tur a ni. IMR hi kum 2/3 chhungin 10 hnuai lamah dah tum a ni a, maternal mortality rate-in kum thum chhungin 50 hnuai lamah dah tum a ni," a ti. Hriselna lama hmasawn tura sorkarin tum a neihte chu a hlawhtlin theih nan department-a thawk zawng zawngte rinawm taka thawk turin a chah.

Zemabawk Health & Wellness Centre ni ta hi kum 2004-ah urban health centre (UHC) anga bul ṭan a ni a, kum 2014-ah UPHC-ah hlân kai a ni. Sorkar laipui scheme Ayushman Bharat hnuaiah Health & Wellness Centre-ah hlân kai leh a ni a, tuna a awmna hmunah March 2018 khan dah a ni.

Hawnna inkhawm hi Health secretary H Lalengmawia'n a kaihruai a; Ayushman Bharat programme-a sorkar laipuiin a thawhpui Johns Hopkins University pawmpui NGO Jhpiego USA vice president Dr Leslie Mancuso leh a thawhpui pangate'n an hmanpui a ni.