UDPA directorate building thar hawn a ni

Urban Development & Po­verty Alleviation (UDPA) directorate building thar, New Capital Complex-a mi chu nimin khan deputy chief minister Tawnluia, UDPA minister-in a hawng. In hi chhâwng kua a ni a, a sak nan cheng nuai 1,100 sèn a ni.

Dy. CM Tawnluia chuan, UDPA chu department pawimawh, khawsak chawikânnaa kawng hrang hranga hma latu, scheme hrang hrang enkawltu leh viltu a nih thu leh Mizorama census notified town 23-a hmasawnna hna kalpuitu a nih thu a sawi a, "UDPA hi department naupang tak ni chungin an hmalakna leh hnathawh a zau hle a ni," a ti.

Aizawl khawpui traffic tâwt tihziaawm nana duan Parking House Support Scheme (PAHOSS) hmangin UDPA-in parking house sak ṭanpuina mi eng emaw zat hnenah a pek chhuah tawh thu sawiin Tawnluia chuan, "Dawng thei thlan chhuahna kalpui chhunzawm leh mek a ni," a ti a; Town & Country Planning hnuaiah district khawpui tin tan master plan siam a nih thu leh khawpui dang 13-ah master plan siam a nihtawh thu a sawi.

UDPA directorate building hawnnaah hian minister Lalruatkima pawhin thu a sawi a; UDPA secretary Dr C Vanlalramsanga'n inlawmna thu sawiin, director Joseph H Lalramsanga'n technical report a pe. Minister R Lalzirliana leh C Lalrinsanga, MLA dang Dr F Lalnunmawia leh C Lalmuanpuia, Aizawl mayor PC Lalhming­thanga leh Lokayukta chairman C Lalsawta te pawh an tel a ni.

UDPA department building thar hi a bul ṭan nan Special Plan Assistance hnuaiah kum 2013-14 khan sum dah a ni a, October 2015 aṭangin contractor Lushai Engineers-te'n an sa ṭan a, June 15, 2019-ah building sak zawh a ni.