ZPM Legislature Party ṭhiah a ni Hming hran kan inphuah leh mai ang - Lalduhoma
Mizoram Legislative Assembly speaker Lalrinliana Sailo chuan September 18, Nilaini khan ZPM Legislature Party (ZLP) a ṭhiat. Speaker hian Zoram Peoples' Movement (ZPM) MLA-te hnenah ZLP din a rem tawh loh thu lehkhain a hriattir a ni. ZLP group leader Lalduhoma chuan, Speaker-in rem a tih loh chuan an ZLP chu a din zui loh tur thu a sawi rualin, hming hran an inpuah mai tur thu a sawi.
ZLP ṭhiah chungchanga Vanglaini zawhna chhangin speaker Lalrinliana Sailo chuan, ZPM chu Election Commission of India-in a pawmpui political party a nih tawh avangin ZPM anga an awm zui a rem tawh lo tih Assembly official lamin an tichiang a, chuvang chuan ZLP chu ṭhiah a ngai ta tih a sawi.
Lalrinliana Sailo chuan, ZLP ṭhiah a nih thu chu ZLP group leader hnenah ziaka pek a nih thu leh ZLP member tin hnenah pek a nih loh thu a sawi a, "Assembly session a awm dawn hnai a, chuvangin, zahawm takin ZLP anga awm zui a remchan tawh loh thu kan hriattir a ni," a ti.
Hetih lai hian, ZLP group leader Lalduhoma chuan Vanglaini palai zawhna chhangin, Assembly Speaker-in ZPM chu political party a nih tak avangin ZLP a din a rem tawh loh thu a hriattir tih a sawi a, "Speaker berin a remtih loh chuan hming hran kan invuah mai ang chu, khin zui kan tum lo. ZPM MLA pasarihte chu kan inhlâwm khawm tlat dawn. Vawiin (September 19) maia lehkha hmu kan nih avangin kan kal zel dan tur kan la ngaihtuah hman lo," a ti.
ZLP Leader chuan, tun hmain independent-a thlan tlin ve tho MNF(D) leh MJD MLA-te pawhin legislature party an din tawh thu sawiin, "MNF-in an lo thawhpui tawh MPC-te ngei pawh kha keimahni ang tho an ni. Tumahin sawisel enah kan en lo," a ti a; Speaker chuan Mizoram Assembly history zawng zawng kalhin thutlukna a siam tih a sawi.
ZPM an zawmin phatsantu (defector) an nih loh thu sawiin Lalduhoma chuan, "ZPM kan zawm hian defector kan ni lo, Anti Defection Law-in a huam chu anmahni thlangtute phatsantute a ni. Keini chu symbol leh flag pakhat hnuaia ding kan ni a, ZPM-a kan awm zel hian min thlangtute kan phatsan lo a, ZPM-a kan awm lohin min thlangtute phatsantu kan ni zawk dawn a ni," a ti.
ZLP secretary Dr Vanlalthlana chuan Vanglaini palai zawhna chhangin, an awm zel dan tur an la sawiho loh thu a sawi a, "Keimahni (MLA) ho te bakah, kan party hotute nen kan la inráwn khawm ang a, kan awm zel dan tur chu a chiang ang," a ti a; ZLP ṭhiah a nih chungchang chu ZPM hruaitute pawh mumal taka an hriattir tawh thu a sawi.
Dr Vanlalthlana chuan, ZLP ṭhiah a nih thu an dawn hnuah nimin khan thil awmzia an zawh chian thu sawiin, "ZLP ṭhiah kher a ngaih chhan leh eng dan hmanga ṭhiah nge tihte kan zawtfiah a, dan ṭan chhan sawi tur mumal an nei lo. ZLP ṭhiah hi Speaker direction (thutlukna) a ni loa sawi a awm a, official-te erawh chuan Speaker thu anga tih a nih thu an sawi a, an inpuh tawn deuh niin a lang. Dan tlawhchhan mumal a awm loh avangin kan dan hremite nen thil tih zel dan tur chu kan la sawiho ang," a ti.