Darzo kai lei a mawih ṭan

Chhimtuipui lui, Darzo kâia lei (suspension bridge)-a thing hman ṭhenkhat chu a mawih ṭan avangin lei hmangtute'n harsatna an tâwk ṭan mek.

Sangaua journalist FC Vanlalzawna hnen aṭanga thu dawn danin, Darzo kai lei hi metre 200-a sei a ni a, lei chhuat rel chungah thing phek eng emaw zat phah a ni. Thing phekte chu a mawih ṭan tawh a, lei hmangtu Chhimtuipui ràl lehlama awmte'n harsatna an tâwk ṭan mek a ni. Maxicab-te chu bungraw phur chungin leiah an tlân an remti tawh lo a, pick-up leh a tlukpui motor ṭhenkhat erawh chu rit phur chungin tlântir an ni thung.

September 18, Nilaini pawh khan pickup rit phur (full load)-in lei a zawh a, lei chhuat phah thing a rah keh/tliah avangin leiah motor ke a tla a, hun rei tak chhung leia kal kai turte an tangkhang phah a ni.